Bolvūs vīns no 4. maija svineibu centralajim nūtikumīm beja prīstera un kūkgrīzēja Ontona Rimoviča vōrdā nosauktō skvēra atklošona.  

Bolvu draudzē  ilgajā godu ritējumā ir kolpōjuši  daudzi ļūti izcyli prāvesti. Kaids šudiņ nūteikti var pavaicōt, dēļ kam taišņi prāvestu Ontonu Rimoviču mes pīmynam īpašā veidā. Atbiļde ir gona vīnkōrša un reizē ļūti pīpīļdeita.  Jam leidzeiga personeiba nav zynoma Latvijas un Lītuvas katōliskajā sabīdreibā. Dzims Lītuvā Šauļu apriņķa Šakinu draudzē, vysu myužu sapņojis par tū, bet vysu myužu kolpojis Latvejas draudzēs: Malnajā  Dukstugolā, Vōrkovā, Andrupenē, Bikovā, Sventē, Rubeņūs, bet vysilgōk, nu 1897. goda leidz 1914. godam, lelajā Bolvu darudzē. Jōatzemoj, ka tymā laikā vēļ nabeja Rugōju, Šķilbānu un Tiļžas draudžu. Kolpōdams Bolvūs, prāvests Ontons Rimovičs ļūti daudz dareja bazneicas sakōrtošonai. Taišņi Bolvūs prāvests nūpītni sōka nūzadorbōtīs ar kūka grīšonas mōkslu, kurai taipat kai Dīvam palyka uzticeigs leidz kopa molai. Par prāvesta grīztajīm kūka tālim kaids Lītovas mōkslas zynōtnīks ir sacejs: ,,Kurš kaut reizi myužā ir satics prāvesta Rimoviča veikumu, tam nikod vaira nabyus mīra, un jys nikod vairs naspēs palikt vīnaldziegs.” Un patīsi, tī vysi ir īpaši izteiksmeigi un emocionali, kotrs ar sovu seju un attīksmi. Šūbreid myusim ir unikāla īspēja Bolvu nūvoda muzejā redzēt plašōkū  pravesta Rimoviča dorbu izstōdi, kaida ir  īspējama apvīnojūt  tūs dorbus, kas atsarūn Šauļu un Rundāles pils muzeja krōjumūs.

Vysōs darudzēs, kur prāvests kolpoja, jys veice nūpītnus būvnīceibas un kūktēlnīceibas dorbus. Bet vysvairōk Bolvu draudzē. Te apglobōta jō mōte, te sovu myuža mōju gribeja atrast ari jys pats.

Ap 1902. godu ap Bolvu bazneicu sōka veidōtīs mīsts. Vysur apleik Bazneicai beja labeibas teirumi, bet vyss centrs atsaroda Verpuļovas sādžā. Prāvests atpērka nū vītejīm cylvākīm mōjas, nūjauce tōs  un otkol uzcēle nu jauna bazneicas tyvumā un laide tymōs īrnīkus: omatnīkus un tērgōtojus.  Taišņi itō īmesļa dēļ Benedikts Skrinda, kurš kolpoja Bolvu draudzē pēc Ontona Rimoviča, nūsauce sovu prīkšgōjeju par Bolvu mīsteņa dybynōtoju un vēja patmaļu taisētoju.

Prāvests aizgōja myužeibā 1933. godā un ir apglobōts Rubeņu bazneicas dōrzā. Napīsapiļdēja jō sapnis byut apglobōtam Bolvūs. 

Sapnis par dzymtū Lītuvu pīzapiļdēja īpašā veidā. Dzeives laikā Ontons Rimovičš ir izveidojs apmāram 500 kūka figuras, daudzas nu kurōm beja lelōkas par 2 metrim. Dzeives laikā jys beja apmeklejs AUŠROS muzeju Šauļūs. Un tašņi šim muzejam ar testamentu piec jō nōvis tyka nūvālāta jō  dorbu kolekcijas lelōko daļa. Ūtro Pasauļa kara laikā daļa nu tim ir gōjuse būjā, bet vēļ šudiņ muzeja krojumūs ir vairōk nakō 100 jō grīztū kūka figuru. Prāvests Rimovičš ir arī izgrīzs vairōkus Krysta ceļus. Divejus nu tim mes varam skateit Šauļu bazneicōs, kur tī sōkuši sovu ūtrū dzeivi.

Dzeives laikā prāvests pīsadaleja daudzōs iztōdiē , ari myusu dīnos jō dorbi teik izstōdeiti Šauļūs Lītuvā, šūgod Latvījā Preiļūs, Rēzeknē, Bolvūs. Jō dorbi atrūdami Rundāles pils muzejā un cytu Latvijas muzeju krōjumūs. Prāvesta Rimoviča myuža dorbi sveicynoj myus īejūt daudzōs Latvijas bazneicōs. Mes varam tikai apbreinōt šō darbeigo cylvāka  daudzveideigū kolpojumu Dīvam un cylvākim.