TREŠŌ DAĻA
Pādejā daļā pōrdūmōsim, kū izcīte Kungs Jezus nu jō vainagošonas ar ērškim leidz mūkpylnajai nōvei uz krysta. Pesteitōja cīsšonu nūpalnus upurēsim dabasu Tāvam par vysim cylvākim. Lyugsim, lai Pesteitōjs pamudynōtu grēcinīkus uz atsagrīzšonu pi Dīva, lai dvēselem, kas atsarūn šķeisteišonas gunī, mozynōtu cīsšonas un mums vysim dūtu patīsas grāku nūžālōšonas žēlesteibu un laimeigu nōves stuņdi.
HIMNA
Ak, muna dvēseļ’, kam tu namīļ’, natveikst?
Kōpēc nu sōpem, muna sirds, tu nageibst’?
Izmet jai Jezu, nu Tovas sirds degsmes
Mīlesteibas dzērkstes.
Raug, mīlesteibā dagdams kai ar guni,
Jys smogū krysta kūku jam uz placim;
Tikkū dzeivs byudams, īt ar gryutu nostu
Uz nōves vītu.
Ļaudarim, beņdem pasadūd bez bailem,
Uz sōp’u krysta labprōteigi gulstās,
Ļaun pōrdūrt rūkas un kōjas ar noglom
Par myusu grākim.
Ak, krysts, tu esi dōrgōks mums par vysu,
Pi sevis turi Pesteitōja mīsu.
Ļauņ, mes jū kopā cīneigi īliksim
Un apraudōsim!
Kaut tagad muna sirds gauži raudōtu,
Un nu šō laika nikod nagrākōtu!
es nūžāloju munu oplomeibu
Un nataisneibu.
Tev pīder, Jezu, gūds ar pateiciebu
Par tū brīsmeigi lelū labdareibu,
Ka myus bēdeigus, cīsdams krysta nōvi,
Nu eļnes glōbi.
DVĒSELES SŌPES PAR JEZUS CĪSŠONOM
Jezus, napateiceigō ļaužu pyuļa
Zamōks par Barnabu nūskaiteits.
Muns meilais Jezus!
Jezus, uz nōvi pi krysta
Pilata nataisneigi nūtīsōts.
Muns meilais Jezus!
Jezus, smogu krysta nostu
Uz Kaļvarijas kolnu nest pīspīsts.
Muns meilais Jezus
Jezus, pi nagūda krysts
Ar noglom šausmeigi pīkolts.
Muns meilais Jezus!
Jezus, storp divim slapkovom
Ar krystu uz augšu pacalts.
Muns meilais Jezus!
Jezus, apliek stōvūšū
Un garumejūšu zaimōts.
Muns meilais Jezus!
Jezus, naizsokomōs slōpēs
Ar ryugtu žuļti un etiki dzirdeits.
Muns meilais Jezus!
Jezus, sova Tāva rūkōs
Goru atdūdams, nūmiris
Muns meilais Jezus!
Jezus, nu krysta nūjimts
Un kopā cīneigi īlykts.
Muns meilais Jezus!
Esi sveicynōts! Esi gūdynōts!
Par mums smōdātais un pazamōtais!
Esi slavynōts, vysur daudzynōts.
Dīvs bezgaleigais!
DVĒSELES SARUNA AR JEZUS MŌTI
«Ak, maņ, Mōtei nūskumeigai,
Stōvūt raudūšai pi krysta,
Žālums sirdi pōrdyure.» (Divkōrt)
«Svātō Mōte, lai es vysod
Jezus kristu prōtā turu,
Sovus grākus apraužu.»
«Jau muns Jezus nūmīļōtais
Mērst par ļaudim, krystā pīkolts.
Ak, kaut es jam leidz mērtu!»
«Grybu, Mōte, leidz ar tevi
Stōvēt uzticeigs pi krysta,
Jezus sōpes gūdynōt.»
Pādejū Jys soka vōrdu
Un uz placim nūlīc golvu.
Palīk mōte vīneiga.
«Dīva Mōte, tevi lyudzu
Izmōc mani krystu mīļōt,
Krystu vysod nest lobprōt.»
TU, KURS PAR MUMS ESI CĪTIS
Tu, kurs par mums esi cītis,
Jezu Kristu, myusu Tu Kungs,
Apsažāloj par mums,
Apsažāloj par mums!
Un tu, kura reizē esi cītuse,
Ak, Marija, Dīva Mōte,
Lyudzīs Dīvu par mums,
Lyudzīs Dīvu par mums!