ŪTRŌ DAĻA
Ūtrajā daļā pōrdūmōsim, kū myusu Pesteitōjs izcīte nu Jō nataisneigōs apsyudzēšonas tīsā leidz Jō krūņōšonai ar ērškim. Pesteitōja cīsšonu nūpalnus upurēsim dabasu Tāvam, lūyudzūt par myusu Dzimtini, mīru un sasaprasšonu storp cylvākim, grāku pīdūšonu un izaglōbšonu nu nalaimem.
HIMNA
Verīs, ak cylvāk, kai Dīvs tevi mīļoj,
Ka sevis poša tevis dēļ nažāloj;
Un tu ar vīn vēļ ļauni Jam moksōsi
Grākus dareisi!
Stōv ļaužu prīškā vyspasauļa Kēneņš
Naatbiļd vōrda, leidz kai lēneigs jēreņš
Ar boltu drēbi apsmīkļam teik apģērbts,
kai nagudrs smōdāts.
Par myusu grākim jū ar reikstem šausta.
Plyust svātais asnis, mīsa bryucem klōta.
Mums, grēcinīkim, svātō ašņa straumē
Ir mīrs un dzeive.
Lepneigais pasauļs sovu golvu krūņoj,
Pats nīceigs byudams, Dīvu Kungu zaimoj.
Tys Kungam Jezum ēršku krūni pyna
Un golvā lyka.
Kaut tagad muna sirds gauži raudōtu
Un nu šo laika nikod nagrākōtu!
Es nūžāloju munu oplomeibu
Un ļaunprōteibu.
DVĒSELES SŌPES PAR JEZUS CĪSŠONOM
Jezus, ļaužu pulkā
Par nūkaunamū ļaundari nūklīgts.
Muns meilais Jezus!
Jezus, ļauneigu beņžu
Nagūdeigi vaigā apspļauts.
Muns meilais Jezus!
Jezus, tīsas pogolmā treiskōrteigi
Sova mōcekļa nūlīgts.
Muns meilais Jezus!
Jezus, nažēleigu karaveiru
Uz pilata nomu aizvasts.
Muns meilais Jezus!
Jezus,nu Heroda mōjas sulainim
Kai naprōteigs smōdāts.
Muns meilais Jezus!
Jezus, lelōkam izsmīkļam
Boltā svōrkā apģērbts.
Muns meilais Jezus!
Jezus, pi stoba pīsīts
Un ar reikstem brīsmeigi šausteits.
Muns meilais Jezus!
Jezus, ar ēršku vainagu
Karaveiru nūdaļas krūņōts.
Muns meilais Jezus!
Jezus, vacā sorkonā sveitā
Lelōkai izzūbōšonai apvylkts.
Muns meilais Jezus!
Jezus, ar vāzom systs golvā
Un smīklam saukts par kēneņu.
Muns meilais Jezus!
Esi sveicynōts! Esi gūdynōts!
Par mums smōdātais un pazamōtais!
Esi slavynōts, vysur daudzynōts,
Dīvs bezgaleigais!
DVĒSELES SARUNA AR JEZUS MŌTI
«Ak, es radzu sovu Dālu
Pīsītu pi stoba kailu
Un ar reikstem šausteitu.» (Divkōrt)
«Dīva Mōte, lyudzu, tevi,
Tova Dāla bryuču zeimes
Dzili munā sirdī spīd.»
«Radzu dzalūņaini ērški
Nūspīž golvu nažēleigi
Munam Dālam mīleigam.»
«Tova Dāla nūšausteitō
Un ar ērškim apkrūņōtō,
Sōpes ar mums sadoli.»
«Ak, kaut tagad atļauts byutu
Tovu muns Dāls, krystu gryutu
Maņ uz placim pošai nest!»
«Lic man Jaunava,Vyssvātō,
Lai es tova Dāla krystu
Leidz ar tevi nosōtu.»
TU, KURS PAR MUMS ESI CĪTIS
Tu, kurs par mums esi cītis,
Jezu Kristu, myusu Tu Kungs,
Apsažāloj par mums,
Apsažāloj par mums!
Un tu, kura reizē esi cītuse,
Ak, Marija, Dīva Mōte,
Lyudzīs Dīvu par mums,
Lyudzīs Dīvu par mums!