PYRMŌ DAĻA
Pōrdūmōsim myusu Pesteitōja cīsšonas nu lyugšonas Getzemanes dōrzā leidz Jō nataisneigai apvainōšonai jūdu augstōs tīsas prīškā. Kunga Jezus cīsšonu nūpalnus upurēsim dabasu Tāvam par svātū katoliskū Bazneicu, par myusu vysaugstōkū gonu pāvestu un vysim gareidznīkim, lai izalyugtu Dīva svēteibu jū dorbam.
HIMNA
Lai žālums rūnās, sōpes sirdi nūmōc,
Kod lobais Jezus sōpu gaitas īsōc,
Olivu dōrzā ašņa svīdrim apklōts,
Mōcekļu atstōts.
Viļteigais Judass nūdūdams jū skūpsta,
Un karaveiri jū ar vērvem saista.
tai Vyssvātōkū kai slapkovu sagyun,
Zaimojūt sasīn!
Syt gryusta Jezu bendes nažēleigi,
Uz vysom pusem rausta Jū brīsmeigi;
Uz tīsu aizvad lēneigū Jēreņu-
Augstū Kēneņu..
Jō svātais vaigs ar dyurem rupi sasysts,
Vyss bryucem apklōts, kai ar asni aplīts;
Bet lobais Jezus nivīnu naapsyudz,
Klus un Dīvu lyudz..
Kaut tagad muna sirds gauži raudōtu
Un nu šō laika nikod nagrākōtu!
Es nūžāloju munu oplomeibu
Un cītsirdeibu.
DVĒSELES SŌPES PAR JEZUS CĪSŠONOM
Jezus, brīsmeigai krysta nōvei
tautas vacōkū nūdūts
Muns mīlais Jezus!
Jezus par trejsdesmit grašim
Napateiceigō mōcekļa nūdūts.
Muns meilais Jezus!
Jezus, pi lyugšonas Olivu dōrzā
Naizsokomom nōves bailem padūts.
Muns meilais Jezus!
Jezus, nūskumeigs leidz nōvei,
Ar ašņa svīdrim applyudis.
Muns meilais Jezus!
Jezus, ar viļteigu bučōšonu
Nalīteigō Judasa nūdūts.
Muns meilais Jezus!
Jezus, ar rasnom vērvem
Karaveiru rūkom sasīts.
Muns meilais Jezus!
Jezus, Annasa nomā
Sulaiņu pyuļa pīsmīts.
Muns meilais Jezus!
Jezus, pa tīsas pogolmu
Uz Kaifasa nomu aizvasts.
Muns meilais Jezus!
Jezus, jūdu tīsas prīškā
Bez vaines ļaužu pulkā plikōts.
Muns meilais Jezus!
Jezus, diveju līcinīku
pi tīsas nataisneigi apsyudzāts.
Muns meilais Jezus!
Esi sveicynōts! Esi gūdynōts!
Par mums smōdātais un pazamōtais!
Esi slavynōts, vysur daudzynōts,
Dīvs bezgaleigais!
DVĒSELES SARUNA AR JEZUS MŌTI
Ak, es Mōte nūskumeigō!
Sōpe mani spīž brīsmeiga,
Zūbyns sirdi cauri dur. (Divkōrt)
-«Kōpēc, Mōte nūmīļōtō
Poša Dīva izvālātō,
Esi ļūti satrīkta?»
«Ak, kū vaicoj? Asu skuma,
Tikkū dzeiva nu žāluma:
Sirds nu sōpem pageibst maņ.»
«Pasok svātō vaļdineica,
Kōpēc esi nūskumuse,
Kōpēc osorōs sleiksti»
«Radzu ļaužu Pesteitōju,
Munu Dālu nūmīļōtū,
Ašņa svīdrim apklōtu.»
«Svātō Dīva Dzemdeitōja,
Žēlesteibas izlyudzēja,
Dūd maņ ar tevi raudōt.»
TU, KURS PAR MUMS ESI CĪTIS
Tu, kurs par mums esi cītis,
Jezu Kristu, myusu Tu Kungs,
Apsažāloj par mums,
Apsažāloj par mums!
Un tu, kura reizē esi cītuse,
Ak, Marija, Dīva Mōte,
Lyudzīs Dīvu par mums,
Lyudzīs Dīvu par mums!