Menu:














 


svātdĪna, 30. juļs

PYRMAIS LASEJUMS                                                                                1 Kēn 3, 5. 7–12

Salomons lyudz nu Dīva gudreibu.

LASEJUMS NU KĒNEŅU PYRMŌS GRŌMOTAS

Tamōs dīnōs:

Gibeonā Kungs pasarōdeja Salomonam sapnī nakts laikā, saceidams: «Lyudz, kū vēlejīs, lai es tev tū dūtu.» Bet Salomons atbiļdēja: «Kungs, muns Dīvs, tu esi īcēlis sovu kolpu par kēneņu muna tāva Davida vītā, bet es asu vēļ ļūti jauns un maņ nav pīredzes. Tovs kolps turklōt atsarūn tovas tautas vydā, kuru tu esi izvēlējis, lelas tautas vydā, kuru navar ni izskaiteit, ni sarēkinōt tōs lelō vairuma dēļ. Tōdēļ dūd sovam kolpam saprōteigu sirdi, ka jys spātu tīsōt Tovu tautu un izškērt, kas ir lobs un kas ļauns. Jo kas gon spēj iztīsōt šū tovu skaitliski tik lelū tautu?» Un Kungam patyka, ka Salomons lyudz teiši šū lītu. Tōpēc Dīvs jam saceja: «Tōdēļ ka tu lyudzi šū lītu un nalyudzi sev garu myužu, ni bogōteibu, ni nōvi sovim īnaidnīkim, bet lyudzi sev saprōtu izškērt tīsu lītas, tōdēļ es izpyldu tovu vēlēšonūs un dūdu tev gudru un tik saprōteigu sirdi, ka tev leidzeigs nabeja nivīns pyrms tevis, ni ari byus pēc tevis.»

Tys ir Dīva vōrds.

 

PSALME 119 (118)

Refrens: Kungs, es mīļoju tovus lykumus. (R. 97a)

57 Kungs ir muna daļa:

es saceju, ka sorgōšu tovus vōrdus.

72 Tovas mutes lykums maņ ir lobōks

nakai tyukstūši zalta un sudobra.

Refrens

76 Tova žēlesteiba lai mani mīrynoj

saskaņā ar tovu sūlejumu sovam kolpam.

77 Tova apsažālōšona lai nōk pōr mani, un es dzeivōšu,

jo tovs Lykums dora maņ prīcu.

Refrens

127 Tōdēļ es mīļoju tovas bausleibas

vairōk kai zaltu, kai vysteirōkū zaltu.

128 Tōdēļ es vodūs pēc vysom tovom pavēlem

un īneistu ikvīnu vyltus ceļu.

Refrens

129 Apbreinojami ir tovi prīkšroksti,

tōpēc muna dvēsele tūs īvārōs.

130 Tovu vōrdu izskaidrōjums apgaismoj

un saprōtu dūd vīnkōršajim.

Refrens

 

ŪTRAIS LASEJUMS                                                                                        Rom 8, 28–30

Dīvs myusus nūzeimēja kļyut leidzeigim sova Dāla attālam.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Brōli:

Mes zynom, ka tim, kas mīļoj Dīvu, vyss nōk par lobu, tys ir tim, kas saskaņā ar jō lāmumu ir aicynōti. Jo tūs, kurus jys īprīkš pazyna, tūs ari nūzeimēja kļyut leidzeigim sova Dāla attālam, lai jys byutu pyrmdzymtais storp daudzim brōlim. Bet tūs, kurus jys īprīkš nūzeimēja, tūs ari aicynōja; un, kurus aicynōja, tūs ari attaisnōja; bet, kurus attaisnōja, tūs ari apveļteja ar gūdeibu.

Tys ir Dīva vōrds.

 

PYRMSEVANGELIJA DZĪDŌJUMS                                                             Sal. Mt 11, 25

Alleluja.

Mes tev pasateicam, Tāvs, kas esi Kungs pōr dabasim un zemi,

jo tu dabasu vaļsteibas nūslāpumus esi atklōjis mozajim.

Alleluja.

 

EVANGELIJS                                                                                                                       Mt 13, 44–52

Leidzeibas par apslāptū montu, pērli un teiklu.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā Jezus saceja ļaudim:

«Dabasu vaļsteiba pīleidzynojama teirumā apslāptai montai. Kaids cylvāks tū atroda un otkon apslēpe, un, byudams par tū prīceigs, aizgōja un pōrdeve vysu, kas jam beja, un nūpērka šū teirumu. Vēļ dabasu vaļsteiba ir pīleidzynojama tērgōtōjam, kas meklej lobas pērles. Un, atradis vīnu dōrgu pērli, jys aizgōja un pōrdeve vysu, kas jam beja, un nūpērka tū. Vēļ dabasu vaļsteiba ir pīleidzynojama jyurā īmastam teiklam, kas savōc vysaidu sugu zivis. Kod tys beja pylns, jī izvylka tū krostā un apsasāduši lobōs savōce traukā, bet slyktōs izmete ōrā. Tai tys byus ari pasauļa beigōs: eņgeli izīs un nu taisneigū vyds atškērs ļaunūs, un jūs īmess guņs krōsnī. Tur byus raudōšona un zūbu grīzšona. Vai jyus tū vysu saprotot?» Jī atbiļdēja jam: «Jā.» Bet jys tim saceja: «Tōpēc ikvīns Rokstu zynōtōjs, kas mōceits dabasu vaļsteibai, pīleidzynojams nomatāvam, kas nu sovim krōjumim izjam jaunū un vacū.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze