PYRMAIS LASEJUMS Mih 6, 1–4. 6–8
Patīsōs dīvbejeibas byuteiba.
LASEJUMS NU PRAVĪŠA MIHAS GRŌMOTAS
Klausīs, kū runoj Kungs: «Celīs, uzastōj
tīsā kolnu prīškā, un pakolni lai dzērd tovu bolsu.» Klausitēs, kolni, Kunga sprīdumu
un īsaklausit jyus, zemes pamati, jo Kungs īt tīsā ar sovu tautu un Izraeļam tīsā
ceļ pōrmatumus. «Muna tauta, kū es tev izdareju un kur tev beju par nostu? Atbiļdi
maņ! Es tevi izvežu nu Egiptes zemes un nu vergu noma atbreivōju tevi, un
syuteju tova vaiga prīškā Mozu un Āronu, un Mirjamu.» «Kū pīnōceigu lai upureju
Kungam, kod lūceišu ceļus Vysaugstō Dīva prīškā? Vai tod lai jam nasu
dadzynojamūs upurus un godu vacus teļus? Vai tod Kungam patiks tyukstūšas
vucynu, daudzas tyukstūšas eļļas strautu? Vai tod es atdūšu pyrmdzymtū par munu
nūzīgumu; munas mīsas augli – par munas dvēseles grāku?» Tev, cylvāk, jau ir
saceits, kas ir lobs un kū Kungs prosa nu tevis: dareit taisneibu, mīļōt labvēleibu
un pazemeigi staigōt Dīva prīškā.
Tys ir Dīva vōrds.
PSALME 50 (49)
Refrens: Dīva
pesteišonu redzēs taisneigī. (R. sal. 23)
5 «Sapulcynojit
maņ munus svātūs,
kuri, nasūt upuri, nūslēdze ar mani
dereibu.»
6 Un
dabasi sludynōs jō taisneibu,
jo Dīvs ir tīsnesis.
Refrens
8 Es
navaiņōšu tevi par tovim upurim,
jo tovi dadzynojamī upuri vysod ir munā
prīškā.
9 Es
najimšu teļus nu tova noma,
ni ari ōžus nu tova gonampulka.
Refrens
16 «Kōpēc
tu daudzynoj munas bausleibas
un ar sovu muti pīmini munu dereibu?
17 Pamōceibas
tu taču īneidi
un munus vōrdus aizmeti prūjom aiz
sevis.
Refrens
21 Tu tū
dareji, bet es klusēju.
Tu dūmōji, ka es asu tev leidzeigs?
Es apsyudzēšu tevi un tū vysu likšu tev
prīškā.
23 Kas
ness slaves upuri, tys mani gūdynōs,
un kas naaptraipeits staigoj ceļu,
tam es rōdeišu Dīva pesteišonu.»
Refrens
PYRMSEVANGELIJA DZĪDŌJUMS Sal.
Ps 95, 8
Alleluja.
Nanūcītynojit šudiņ sovas sirdis,
bet īsaklausit Kunga bolsā.
Alleluja.
EVANGELIJS Mt 12, 38–42
Jonas zeime.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Daži Rokstu zynōtōji un farizeji Jezum
saceja: «Mōceitōj, mes vēlejamēs nu tevis redzēt zeimi.» Jys atbyldūt saceja
tim: «Ļauna un lauleibas pōrkōpēja ciļts meklej zeimi, bet cyta zeime tai
natiks dūta, kai vīneigi pravīša Jonasa zeime. Jo, kai Jonass trejs dīnas un trejs
naktis beja lelōs zivs vādarā, tai Cylvāka Dāls trejs dīnas un trejs naktis
byus zemes klēpī. Ninives veiri stōsīs tīsā pret šū ciļti un nūtīsōs tū, jo jī,
Jonasam sludynojūt, atsagrīze nu grākim. Un, lyuk, šeit ir vairōk kai Jonass! Dīnvydu
kēnenīne stōsīs tīsā pret šū ciļti un nūtīsōs tū, tōdēļ ka jei nu pasaules
molas nōce klauseitīs Salamona gudreibu. Bet, lyuk, šeit ir vairōk kai
Salamons!»
Tys ir Kunga vōrds.