Menu:














 


svātdĪna, 23. juļs

PYRMAIS LASEJUMS                                                                            Gudr 12, 13. 16–19

Dīvs dūd īspēju nūžālōt grākus.

LASEJUMS NU GUDREIBAS GRŌMOTAS

Nav cyta Dīva kai tikai tu, kurs ryupejīs par vysim, lai pīrōdeitu, ka naesi tīsōjis nataisneigi. Jo tovs spāks ir taisneibas pamats, un tys, ka tu esi vysu Kungs, tevi nūskaņoj vysus žālōt. Tu parōdi spāku, kod nateik tycāts tovai vysvaroneibai, un tu apkaunoj tūs pōrgalveibu, kuri napazeist tevi. Bet tu, varonais valdnīks, tīsoj ar lēneibu un myusus vodi ar lelu mīlesteibu, jo tu spēj izdareit, kod vīn kū gribi. Ar šim dorbim tu mōceji sovu tautu, ka taisneigajam nōkās byut lobam pret cylvākim. Un sovim bārnim tu dōvōji lobu cereibu, ka tu dūd īspēju nūžālōt grākus.

Tys ir Dīva vōrds.

 

PSALME 86 (85)

Refrens: Kungs ir žāļsirdeigs un labvēleigs. (R. Ps 103, 8a)

5 Tu, Kungs, esi lobs un saudzeigs,

un pylns žāļsirdeibas vysim, kas tevi pīsauc.

6 Uzklausi, Kungs, munu lyugumu

un īvāroj munas lyugšonas bolsu.

Refrens

9 Nōks vysas tautas, kū tu esi radejis,

un tevi, Kungs, pīlyugs un slaveis tovu vōrdu,

10 jo tu esi lels un dori breinumus:

vīneigi tu esi Dīvs.

Refrens

15 Bet tu, Kungs, esi žāļsirdeigs un saudzeigs Dīvs,

lānprōteigs, ļūti labvēleigs un patīss.

16 Uzlyukoj mani un esi maņ žēleigs;

dūd spāku sovam kolpam.

Refrens

 

ŪTRAIS LASEJUMS                                                                                                      Rom 8, 26–27

Svātais Gors paleidz myusu vōjumam.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Brōli:

Gors paleidz myusu vōjumam, jo mes eisti nazynom, kū lai lyudzam, bet Gors pats aizbyldynoj par mums ar vaidim, kas nav izsokami vōrdūs. Bet tys, kurs izpētej sirdis, zyna, kū Gors vēlejās, jo jys aizlyudz par svātajim saskaņā ar Dīva grybu.

Tys ir Dīva vōrds.

 

PYRMSEVANGELIJA DZĪDŌJUMS                                                                         Sal. Mt 11, 25

Alleluja.

Mes tev pasateicam, Tāvs, kas esi Kungs pōr dabasim un zemi,

jo tu dabasu vaļsteibas nūslāpumus esi atklōjis mozajim.

Alleluja.

 

EVANGELIJS                                                                                                                      Mt 13, 24–43

Leidzeiba par nazōlem labeibas laukā.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Jezus pastōsteja ļaudim cytu leidzeibu, saceidams: «Dabasu vaļsteiba pīleidzynojama cylvākam, kas sovā teirumā īsēja lobu sāklu. Bet, cikom ļaudis gulēja, atnōce jō īnaidnīks un storp kvīšim īsēja nazōli, un aizgōja. Bet, kod labeiba izauga un deve vōrpas, tod pasarōdeja ari nazōles. Un noma tāva kolpi pīgōja un saceja jam: «Kungs, vai tu naīsēji lobu sāklu sovā teirumā? Nu kurīnes tod tymā rodōs nazōles?» Un jys tim atbiļdēja: «Naideigs cylvāks tū izdareja.» Bet kolpi saceja jam: «Vai gribi, ka mes ejam un tōs salosom?» Bet jys saceja: «Nā, lai jyus, ravejūt nazōli, kūpā ar tū naizrautu ari kvīšus. Ļaunit obim augt leidz pļōves laikam. Un pļōves laikā es teikšu pļōvējim: «Savōcit vyspyrms nazōli un sasīnit tū kyuleišūs sadadzynōšonai, bet kvīšus sakrōjit munā škyunī.» Vēļ cytu leidzeibu jys tim stōsteja, saceidams: «Dabasu vaļsteiba ir pīleidzynojama sinepu gryudam, kū cylvāks pajēme un īsēja sovā teirumā. Tei ir vysmozōkō nu vysom sāklom, bet, kod izaug, kļyust lelōka par cytim dōrza stōdim un kļyust par kūku, tai ka dabasu putni nōk un dzeivoj tō zorūs.» Jys tim saceja vēļ cytu leidzeibu: «Dabasu vaļsteiba pīleidzynojama raugam, kū sīvīte jam un ījauc trejūs mārūs myltu, cikom vyss saryugst.» Šū vysu Jezus runōja ļaudim leidzeibōs un bez leidzeibom jys tim narunōja nikō. Tai vajadzēja pīsapiļdeit pravīša vōrdim: «Sovu muti es atvēršu leidzeibōs; atklōšu tū, kas nu pasaules radeišonas beja apslāpts.» Tod, atlaidis ļaudis, jys īgōja nomā, un jō mōcekli, pīgōjuši pi jō, saceja: «Izskaidroj mums leidzeibu par nazōli teirumā.» Jys atbyldūt saceja: «Tys, kas sēj lobū sāklu, ir Cylvāka Dāls, bet teirums ir pasaule. Lobō sākla ir vaļsteibas bārni, bet nazōle ir Ļaunō bārni. Īnaidnīks, kas īsēja nazōli, ir satans. Pļōve ir pasaules gols, bet pļōvēji ir eņgeli. Kai nazōli savōc un sadadzynoj gunī, tai tys nūtiks ari pasaules beigōs. Cylvāka Dāls izsyuteis sovus eņgeļus, un tī salaseis nu jō vaļsteibas vysus īļaunōjumus un tūs, kas dora nataisneibu, un īmess jūs guņs krōsnī. Tur byus raudōšona un zūbu grīzšona. Tod taisneigī speidēs kai saule sova Tāva vaļsteibā. Kam ir ausis, tys lai klausōs.»»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze