PYRMAIS LASEJUMS Mih 2, 1–5
Dīva strōpes pasludynōšona par tautas apspīsšonu.
LASEJUMS NU PRAVĪŠA MIHAS GRŌMOTAS
Bādas tim, kas gudroj nalīteibas un dūmoj
ļaunu sovōs guļvītōs! Reita gaismeņā jī tū izdora, jo tys ir jū rūku spākūs. Jī
īkōroj teirumus un varmūceigi tūs pajam, īkōroj mōjas un tōs sagrōb. Un jī apspīž
veiru un jō nomu, cylvāku un jō montōjumu. Tōpēc Kungs tai soka: «Redzi, maņ nūdūmā
ir šai ciļtei uzsyuteit nalaimi, nu kuras jyus nanūvērssit sovus koklus. Un
jyus nastaigōsit apkōrt tik lapni, jo tys byus nalaimeigs laiks. Tamā dīnā par
jums tiks izteiktas parunas un atskanēs raudu dzīsme:» Mes asam pagolam izpūsteiti.
Munas tautas daļa ir pōrmēreita, kuru nivīns tai vairs naatgrīzs. Atkritējam
teik īdaleiti myusu teirumi.» Tōpēc ari tev nabyus nivīna, kas mastu lūzes
auklu daļas īmēreišonai Kunga draudzē.»
Tys ir Dīva vōrds.
PSALME 10
Refrens: Kungs,
naaizmērsti nabogus. (R. 12b)
1 Kungs,
kōpēc tu stōvi nu tōlīnes,
cīsšonu laikā apslēp sevi,
2 kod ļaunprōtis
dižojās, nabogs teik vojōts
un kreit par upuri jūs viļteibai.
Refrens
3 Jo grēcinīks
ar sovom kōreibom līlejās,
un olkateigais pats sevi svētej.
4 Sovā
lepneibā grēcinīks nūnīvoj Kungu:
«Atmoksas nabyus, nav ari Dīva.»
Refrens
7 Ar lōstim,
krōpšonu un vyltu jō mute ir pylna,
ļaunprōteiba un pūsts uz jō mēles.
8 Jys
slāptuvēs sēž pi celim,
navaineigū slapani nūnōvej.
Refrens
14 Bet
tu redzi, tu nūvāroj pūstu un bādas,
lai tōs jimtu sovōs rūkōs.
Tev atdevis ir nabogs,
tu esi kļyvis aizstōvis bōrinim.
Refrens
PYRMSEVANGELIJA DZĪDŌJUMS 2 Kor 5, 19
Alleluja.
Dīvs pasauli caur Kristu samīrynōja ar
sevi
un mums deve samīrynōšonōs vōrdu.
Alleluja.
EVANGELIJS Mt 12, 14–21
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Farizeji, izgōjuši ōrā, nūturēja apsprīdi
pret Jezu, kai jū nūgalynōt. Bet Jezus, tū zynōdams, aizgōja nu turīnes. Un
daudzi jam sekōja, un jys tūs vysus izdzīdynōja, un pavēlēja, lai tī jō naatklōj.
Tai vajadzēja izapiļdeit pravīša Isaja vōrdim: «Lyuk, muns kolps, kuru es
izredzēju, muns mīļōtais, kas labpateik munai dvēselei. Uz jū es likšu sovu
goru, un jys pasludynōs tīsu tautom. Jys nasanaidōs un natrūkšņōs, un nivīns uz
īlas nadzērdēs jō bolsa. Jys nanūlauzs aizlauztu nīdri un naizdzēss kvālojūšu
dakti, cikom nabyus licis uzvarēt taisneibai. Un tautas cerēs uz jō vōrdu.»
Tys ir Kunga vōrds.