PYRMAIS LASEJUMS Is 10, 5–7. 13–16
Asirija ir Dīva reikste.
LASEJUMS NU PRAVĪŠA ISAJA GRŌMOTAS
Tū soka Kungs:
«Asurs, munas bardzeibas reikste, jam rūkā
munu dusmu vāza! Es syutu jū pret bezdīveigu tautu, dūdu jam pavēli pret ļaudim,
uz kurim maņ dusmes, lai jys sagrōb īpašumus, lai nūmat jūs sameišonai kai īlas
dubļus. Bet jys pats tai nadūmoj, un jō sirds na tai tū saprūt, jō nūdūmūs ir
satrīkt un iznycynōt na mozumu tautu. Jo jys saceja: «Ar sovas rūkas spāku es tū
izdareju un ar sovu gudreibu, jo es asu prōteigs. Un es aizvōču tautu rūbežas
un izlaupeju jūs krōjumus, un kai spākaveirs nūgōžu sādūšūs trūnī. Muna rūka
kai ligzdu atvēre tautu bogōteibas; un kai teik savōktas atstōtōs ūlas, tai es
sagrōbu vysu zemi, un nabeja nivīna, kas sōktu kuļt spōrnus vai byutu atplētis kņōbi
un īsapeikstējis.» Vai tod cērvs līleisīs tō prīškā, kas ar tū cārt, un vai dižōsīs
zōgis tō prīškā, kas ar tū zōgej? It kai pōtoga grybātu sašyupōt tū, kas tū pacēlis,
un it kai vāza grybātu paceļt tū, kas nav kūks.» Tōpēc Vaļdnīks, debesspulku
Kungs, uzsyuteis jū traknajim nūvōjēšonu. Un zam jō gūdeibas īsasviļs dagums,
kai mādz uzlīsmōt guņsgrāks.
Tys ir Dīva vōrds.
PSALME 94 (93)
Refrens: Kungs
naatstums sovu tautu. (R. 14a)
5 Grēcinīki
apspīž, Kungs, tovu tautu
un vojoj tovu montōjumu.
6 Jī nūgalynoj
atnōcēju un atraitni
un nūnōvej bōriņus.
Refrens
7 Jī
soka: «Dīvs naredz,
un Jākuba Dīvs namona.»
8 Saprūtit
jyus, naprōteigī tautā,
un, muļki, kod jyus paliksit gudri?
Refrens
9 Vai
tod tys, kurs ausi ir dēstejis, nadzērdēs,
un vai naredzēs tys, kurs ir veidōjis
aci?
10 Vai
tod tys, kurs pōrmōca tautas, nastrōpeis,
tys, kurs cylvākam gudreibu mōca?
Refrens
14 Jo
Kungs naatstums sovu tautu
un naatstōs sovu montōjumu.
15 Tōdēļ
ka sprīdums atsagrīzs pi taisneibas,
un tai sekōs vysi, kam skaidra sirds.
Refrens
PYRMSEVANGELIJA DZĪDŌJUMS Sal. Mt 11, 25
Alleluja.
Mes tev pasateicam, Tāvs, kas esi Kungs
pōr dabasim un zemi,
jo tu dabasu vaļsteibas nūslāpumus esi
atklōjis mozajim.
Alleluja.
EVANGELIJS Mt 11, 25–27
Dabasu vaļsteibas nūslāpumi ir atklōti mozajim.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā Jezus, sōkdams runōt, saceja:
«Tāvs, dabasu un zemes Kungs, es tevi slaveju, ka tu esi tū apslēpis gudrajim un
prōteigajim, bet atklōjis tū mozajim. Jā, Tāvs, jo tai tev beja labpaticis.
Vysu maņ ir devis muns Tāvs. Un nivīns napazeist Dālu, kai tikai Tāvs: un nivīns
napazeist Tāvu, kai tikai Dāls un tys, kuram Dāls gribēs tū atklōt.»
Tys ir Kunga vōrds.