PYRMAIS LASEJUMS Jk 1, 12–18
Dīvs nivīnu namudynoj uz ļaunu.
LASEJUMS NU SVĀTŌ APOSTOLA JĀKUBA VĒSTULES
Svēteigs ir veirs, kurs iztur kārdynōjumu,
jo tod, kod byus pōrbaudeits, jys sajims dzeiveibas krūni, kū Dīvs ir apsūlejis
tim, kas jū mīļoj. Nivīns kārdynōjuma laikā lai nasoka: «Mani Dīvs kārdynoj»,
jo Dīvs pats uz ļaunu nateik kārdynōts, un jys ari nakārdynoj nivīnu. Bet ikvīnu
kārdynoj jō poša īkōre, kas jū vylynoj un valdzynoj. Pēc tam īkōre, kod ir ījāmuse,
dzemdej grāku, bet grāks, kod tys ir padareits, dzemdej nōvi. Nasaļaunit sevi pīkrōpt,
muni meilī brōli! Vyss lobais, kū mes sajamam, un vysas piļneigōs dōvonas nōk
nu augšīnes, tōs nūsalaiž nu gaismas Tāva, kurā nav pōrmaiņu, ni maineiguma ānas.
Pēc sovas grybas jys myusus ir dzymdynōjis ar patīseibas vōrdu, lai mes byutu
it kai jō radejumu pyrmdzymtī.
Tys ir Dīva vōrds.
PSALME 94 (93)
Refrens: Svēteigas
ir Dīva pamōceibas. (R. sal. 12a)
12 Svēteigs
ir cylvāks, kuru tu, Kungs, audzynoj
un pamōci jū ar sovu lykumu,
13 lai ļautu
jam atsapyust
ļaunajōs dīnōs.
Refrens
14 Jo
Kungs naatstums sovu tautu
un naatstōs sovu montōjumu.
15 Tōdēļ
ka sprīdums atsagrīzs pi taisneibas,
un tai sekōs vysi, kam skaidra sirds.
Refrens
18 Kod
es saceju: «Pasleidēja maņ kōja»,
tod tova žēlesteiba, Kungs, atbaļsteja
mani.
19 Kod
munā sirdī vairōjōs bažas,
tod tovs mīrynōjums īprīcynōja munu dvēseli.
Refrens
PYRMSEVANGELIJA DZĪDŌJUMS Jņ 14, 23
Alleluja.
Kas mani mīļoj, tys munus vōrdus piļdeis,
soka Kungs;
un muns Tāvs jū mīļōs, un mes nōksim pi
jō.
Alleluja.
EVANGELIJS Mk 8, 14–21
Sorgojitēs nu farizeju rauga.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MARKS
Tymā laikā:
Jezus mōcekli beja aizmērsuši pajimt
leidza maizi. Un jim laivā nabeja leidza vairōk kai tikai vīns maizes klaips. Un
jys tim pīkūdynōja, saceidams: «Pīlyukojit, sorgitēs nu farizeju rauga un nu
Heroda rauga!» Jī sovā storpā sōce pōrsprīst tū, ka nav pajāmuši maizi. Tū īvārōjis,
Jezus jim saceja: «Kōpēc jyus sprīžat par tū, ka jums nav maizes? Vai tod jyus
vēļ namonat un nasaprūtat? Vai jyusu sirds ir nūcītynōta? Jums ir acis, bet
jyus naredzit; jums ir ausis, bet jyus nadzērdit? Vai naatceritēs, cik pylnus
grūzus jyus savōcet nu pōrpalykušajom druskom, kod es pīcas maizes laužu pīcom tyukstūšom
cylvāku?» Jī saceja: «Divpadsmit.» Un, kod septeņas maizes laužu četrom tyukstūšom,
cik pylnus grūzus savōcet ar druskom? Jī atbiļdēja: «Septeņus.» Tod jys tim
saceja: «Kai tod jyus vēļ nasaprūtat?»
Tys ir Kunga vōrds.