PYRMAIS LASEJUMS Os 11, 1. 3–4. 8c–9
Dīva mīlesteiba pret izvālātū tautu.
LASEJUMS NU PRAVĪŠA OSEJA GRŌMOTAS
Tū soka Kungs:
«Es mīļōju Izraeli, kod jys beja vēļ bārns,
un ataicynōju sovu dālu nu Egiptes. Saucu uz jim – tagad tī aizīt prūjom, uperej
baalim un kyupinoj dīvekļim. Un es mōceju Efraimu staigōt, es nešu jūs uz sovom
rūkom, bet jī nasaprota, ka es par jim gōdōju. Es vežu jūs ciļvēciskā saitē, mīlesteibas
saitē, un beju jim kai taids, kas pīglauž zeidaini pi sova vaiga. Es pīsalīču
un devu jam ēst. Muna sirds pōrsavērš manī, taipat ari sasaceļ manī žālums. Es
naļaušu vaļu sovom dusmem, es naīšu pazudynōt Efraimu, jo asu Dīvs, navys cylvāks,
asu tovā vydā Svātais un nanōkšu pazudynōt.»
Tys ir Dīva vōrds.
PSALME 80 (79)
Refrens: Dīvs,
ved myusus otkon pi sevis. (R. sal. 4a)
2 Klausīs,
Izraeļa ganeitōj!
Tu, kas sēdi pōr kerubim, pasarōdi gaismā.
3 Uzmūdynoj
sovu varonū spāku
un nōc, lai myusus izglōbtu.
Refrens
15 Debesspulku
Dīvs, atsagrīz,
pasaskoti nu dabasim, uzlyukoj un
apraugi šū veinakūku,
16 un
pasorgoj jū, kū ir īstōdejuse tova lobō rūka,
atlasi, kū tu sev esi nūstyprynōjis.
Refrens
PYRMSEVANGELIJA DZĪDŌJUMS Mk 1, 15
Alleluja.
Dīva vaļsteiba ir tyvu,
nūžālojit grākus un ticit Evangelijam.
Alleluja.
EVANGELIJS Mt 10, 7–15
Nūrōdejumi apostoliskajā dorbā.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā Jezus saceja sovim apostolim:
Eite un sludynojit, saceidami: «Dabasu
vaļsteiba ir tyvu.» Dzīdynojit slymūs, augšancelit myrušūs, spitaleigūs dorit teirus,
izdzenit ļaunūs gorus; par veļti asat sajāmuši, par veļti dūdit. Naīsagōdojit
ni zaltu, ni sudobru, ni varu sovōs jūstōs. Najemit ceļā sūmu, ni divus svōrkus,
ni sandales, ni spīki, jo strōdnīks ir sova uztura cīneigs. Un, kurā piļsātā
vai cīmā jyus īīsit, nūskaidrojit, kas tamā ir cīneigs, un tur palicit, koleidz
izīsit. Īejūt mōjā, sveicynojit tū, un, jo mōja byus tū peļnejuse, tod lai jyusu
mīrs nōk pōr tū, bet, jo nabyus peļnejuse, tod lai jyusu mīrs atsagrīž pi jums.
Bet, jo kas jyusu nauzjems un jyusu vōrdūs nasaklauseis, tod izejit ōrā nu šōs
mōjas vai piļsātas, nūkrotit putekļus nu sovom kōjom. Patīši es jums soku:
sodomīšu un gomorīšu zemei byus vīglōk tīsas dīnā, nakai šai piļsātai.»
Tys ir Kunga vōrds.