Menu:














 


8. septembris

VYSUSVĀTŌKŌS JAUNOVAS MARIJAS DZIMŠONA

Svātki

PYRMAIS LASEJUMS Mih 5, 1-4a

Mesija ceļsīs nu Betlemes.

LASEJUMS NU PRAVĪŠA MIHAS GRŌMOTAS

Tū soka Kungs Dīvs:

«Un tu, Betleme Efrata, esi moza storp Jūdas tyukstūšim. Nu tevis maņ nōks tys, kurs vaļdeis pōr Izraeli. Un jō izceļsme nu seņsenim laikim, nu myužeibas dīnom. Tōdēļ Kungs jūs atstōs leidz laikam, kod dzemdēs tei, kurai jōdzemdej. Tod atlykušī nu jō brōlim atsagrīzs pi Izraeļa dālim. Un jys stōsīs un ganeis Kunga spākā, Kunga, sova Dīva, vōrda majestātē. Un jī dzeivōs mīrā, tōdēļ ka jō lelums tod snēgsīs leidz pat zemes rūbežom. Un jys pats byus mīrs.»

Tys ir Dīva vōrds.

 

PSALME 96 (95)

Refrens: Muna dvēsele gavilej Dīvā. (Is 61, 10b)

1 Dzīdit Kungam jaunu dzīsmi,

dzīdit Kungsm, vysa zeme!

2 Dzīdit Kungam, teicit jō vōrdu,

jō pesteišonu sludynojit nu dīnas dīnā!

Refrens

11 Lai prīcojās dabasi un gavilej zeme,

lai šalc jyura un vyss, kas tur mōjoj,

12 lai līksmoj lauki un vyss, kas tū pīpylda,

it vysi meža kūki lai gavilej.

Refrens

13 Kunga vaiga prīškā, jo jys tyvojās,

jo jys nōk, lai tīsōtu zemi.

Pasauli jys tīsōs pēc taisneibas

un tautas – sovā patīseibā.

Refrens

 

Voi:

 

ŪTRAIS LASEJUMS Rom 8, 28-30

Dīvs leidzdorbojās tim, kuri jū mīļoj.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Brōli:

Mes zynom, ka tim, kas mīļoj Dīvu, vyss nōk par lobu, tys ir, tim, kas saskaņā ar jō lāmumu ir aicynōti. Jo tūs, kurus jys īprīkš pazyna, tūs ari nūzeimēja kļyut leidzeigim sova Dāla attālam, lai jys byutu pyrmdzymtais storp daudzim brōlim. Bet tūs, kurus jys īprīkš nūzeimēja, tūs ari aicynōja: un kurus aicynōja, tūs ari attaisnōja; bet kurus attaisnōja, tūs ari apveļteja ar gūdeibu.

Tys ir Dīva vōrds.

 

PYRMSEVANGELIJA DZĪDŌJUMS

Alleluja.

Laimeiga tu esi, Vysusvātōkō Jaunova Marija,

un ikvīna pagūdynōjuma cīneiga,

tōdēļ ka nu tevis ir dzimis taisneibas saule – Kristus, myusu Dīvs.

Alleluja.

 

EVANGELIJS Mt 1, 1-16. 18-23

Kas Marijā dzimis, tys ir nu Svātō Gora.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Jezus Kristus, Davida dāla, Abrahama dāla, ciļmes grōmota. Abrahamam dzyma Īzāks, Īzākam dzyma Jākubs, Jākubam dzyma Jūda un jō brōli. Jūdam nu Tamaras dzyma Faress un Zara, Faresam dzyma Esrons, Esronam dzyma Arams, Aramam dzyma Aminadabs, Aminadabam dzyma Nasons, Nasonam dzyma Salmons, Salmonam nu Rahabes dzyma Boozs, Boozam nu Rutas dzyma Obeds, Obedam dzyma Jesse, Jessem dzyma kēneņš Davids. Davidam dzyma Solomons nu tōs, kas beja Ūrija sīva. Salomonam dzyma Roboams, Roboamam dzyma Abijs, Abijam dzyma Azs, Azam dzyma Jozafats, Jozafatam dzyma Jorams, Joramam dzyma Ozijs, Ozijam dzyma Joatams, Joatamam dzyma Ahazs, Ahazam dzyma Ezehijs, Ezehijam dzyma Manass, Manasam dzyma Amons, Amonam dzyma Josijs, Josijam Babilonas trimdā dzyma Jehonijs un jō brōli. Un pēc Babilonas trimdas Jehonijam dzyma Salatieļs, Salatieļam dzyma Zorobabeļs, Zorobabeļam dzyma Abiuds, Abiudam dzyma Eljakims, Eljakimam dzyma Azors, Azoram dzyma Sadoks, Sadokam dzyma Ahims, Ahimam dzyma Eliuds, Eliudam dzyma Eleazars, Eleazaram dzyma Matans, Matanam dzyma Jākubs. Bet Jākubam dzyma Jezups, Marijas veirs, nu kuras pīdzyma Jezus, kas teik saukts Kristus. Ar Jezus Kristus dzimšonu beja tai: Kod jō Mōte Marija beja sadarynōta ar Jezupu, pyrms nakai jī sagōja kūpā, izarōdeja, ka jei ir mōtes cereibōs nu Svātō Gora. Jezus, jōs veirs, byudams taisneigs un nagrybādams jai ceļt naslavi, gribēja jū klusom atstōt. Bet cikom jys par tū dūmōja, lyuk, Kunga eņgeļs pasarōdeja jam sapnī, saceidams: «Jezup, Davida dāls, nasabeisti pījimt sovu sīvu Mariju, jo, kas jymā dzimis, tys ir nu Svātō Gora. Un jei dzemdēs Dālu, un tu jū nūsauksi vōrdā Jezus, jo jys atpesteis sovu tautu nu tōs grākim.» Bet tys vyss nūtyka, lai pīsapiļdeitu, kū Kungs beja runōjis caur pravīti, sokūt: «Lyuk, Jaunova ījims un dzemdēs Dālu, un jū nūsauks vōrdā Emanueļs», kas tulkōjumā ir «Dīvs ar mums».

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze