Menu:














 


pīktdīna, 8. decembris

VYSUSVĀTŌKŌS JAUNOVAS MARIJAS BEZVAINEIGŌ ĪJIMŠONA

Obligatōs svineibas

PYRMAIS LASEJUMS Rad 3, 9-15. 20

Es ceļšu īnaidu storp tevi un sīvīti.

LASEJUMS NU RADEIŠONAS GRŌMOTAS

Pēc tam, kod pyrmais cylvāks beja ēdis aizlīgtū augli, Kungs Dīvs sauce Odumu un jam jautōja: «Kur tu esi?» Jys atbiļdēja: «Es dōrzā dzērdēju tovu bolsu un nūsabeidu, jo asu plyks, un tod es pasaslēpu.» Dīvs jam saceja: «Kas tev teice, ka tu esi plyks? Vai tikai tu naesi ēdis nu tō kūka, nu kura tev beju aizlīdzis ēst?» Un cylvāks saceja: «Sīvīte, kū tu maņ devi par bīdrini, deve maņ nu šō kūka, un es ēžu.» Tod Kungs Dīvs jautōja sīvītei: «Kōpēc tu tū izdareji?» Jei atbiļdēja: «Čyuska mani pīvyla, un es ēžu.» Tod Kungs Dīvs saceja čyuskai: «Tōdēļ ka tu tū izdareji, tu esi nūlōdāta storp vysim mōjas un lauka zvērim! Tu rōpōsi uz vādara un reisi putekļus vysōs sova myuža dīnōs. Es ceļšu īnaidu storp tevi un sīvīti, storp tovu dzymumu un jōs dzymumu; jei sameis tev golvu, bet tu īkūssi jam papīdī.» Un Odums nūsauce sovu sīvu vōrdā Īva, jo jei beja vysu dzeivū mōte.

Tys ir Dīva vōrds.

 

PSALME 98 (97)

Refrens: Dzīdit Kungam jaunu dzīsmi. (R. 1a)

1 Dzīdit Kungam jaunu dzīsmi,

jo jys ir veicis breinumdorbus!

Jam uzvaru nese jō lobō rūka,

jō rūka, kas ir svāta.

Refrens

2 Sovu pesteišonu Kungs ir darejis zynomu,

tautu prīškā atklōjis sovu taisneibu.

3 Jys ir atcerējīs sovu labvēleibu

un sovu uzticeibu Izraeļa nomam.

Refrens

Vysas zemes molas redzēja

myusu Dīva pesteišonu.

4 Gavilejit Dīvam, vysa zeme,

prīcojitēs, līksmojit un dzīdit!

Refrens

 

ŪTRAIS LASEJUMS Ef 1, 3-6. 11-12

Dīvs ir myusus izredzējis Kristū.

LASEJUMS NU SVĀTŌ APOSTOLA PŌVULA VĒSTULES EFEZĪŠIM

Lai slaveits Dīvs un myusu Kunga Jezus Kristus Tāvs, kas mums Kristū ir devis ikvīnu goreigū svēteibu dabasu lītōs. Taipat jys Kristū ir izredzējis myusus jau pyrms pasauļa radeišonas, lai jō prīškā mes byutu svāti un navainojami mīlesteibā. Jys ir paredzējis saskaņā ar sovas gribas lāmumu myusus pījimt par bārnim caur Jezu Kristu, lai tyktu pagūdynōta jō slaves pylnō žēlesteiba, kū jys mums dōvōja mīļōtajā Dālā. Jymā ari mes asam klivuši montōjuma leidzdaleibnīki. Saskaņā ar tō nūdūmu, kas vysu dora pēc sovas grybas lāmuma, mes asam īprīkš nūzeimōti veicynōt jō gūdeibas slavi, mes, kas jau agrōk bejom cerējuši uz Kristu.

Tys ir Dīva vōrds.

 

PYRMSEVANGELIJA DZĪDŌJUMS Lk 1, 28

Alleluja.

Esi sveicynōta, Marija, žēlesteibas pylnō,

Kunga ir ar tevi, tu esi svēteita storp sīvītem.

Alleluja.

 

EVANGELIJS Lk 1, 26-38

Esi sveicynōta, žēlesteibas pylnō, Kungs ir ar tevi.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Tymā laikā:

Dīvs syuteja eņgeli Gabrieli uz Galilejas piļsātu, kas saucēs Nazarete, pi Jaunovas, kas beja sadarynōta ar veiru, vōrdā Jezups, nu Davida ciļts. Un Jaunovas vōrds beja Marija. Un eņgeļs, īgōjis pi jōs, saceja: «Esi sveicynōta, žēlesteibas pylnō, Kungs ir ar tevi!» Jei sasatryuka par šim vōrdim un dūmōja, kas tys varātu byut par sveicīni. Bet eņgeļs jai saceja: «Nasabeisti, Marija, jo tu esi atroduse žēlesteibu pi Dīva. Redzi, tu ījimsi un dzemdēsi Dālu, un jū nūsauksi vōrdā Jezus. Jys byus lels, un jū sauks par Vysaugstō Dālu, un Kungs Dīvs jam dūs jō tāva Davida trūni. Un jys vaļdeis pōr Jākuba nomu myužeigi, un jō vaļsteibai nabyus gola.» Tod Marija saceja eņgeļam: «Kai tys nūtiks, jo es taču veira napazeistu?» Un eņgeļs jai atbyldūt saceja: «Svātais Gors nōks pōr tevi, un Vysuaugstō spāks tevi apānōs. Tōpēc ari Svātais, kas pīdzims, tiks saukts par Dīva Dālu. Lyuk, Elizabete, tova radineica, vēļ sovā vacumā ir ījēmuse dālu, un šys ir sastais mēness tai, kuru sauce par naaugleigu. Dīvam taču nikas nav naīspējams.» Tod Marija saceja: «Raug, es asu Kunga kolpyune; lai maņ nūteik pēc tova vōrda.» Un eņgeļs nu jōs aizgōja.

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze