Menu:














 


SVĀTDĪNA,  7. JANVARs

KUNGA JEZUS KRISTEIŠONA

Svātki

PYRMAIS LASEJUMS Is 42, 1 - 4. 6 - 7

Kristus ir Dīva kolps, kurs jam ir pateikams.

LASEJUMS NU PRAVĪŠA ISAJA GRŌMOTAS

Tai soka Kungs:

«Raug, muns kolps, kuram es paleidzu, muns Izvālātais, kurs pateik munai dvēselei. Es jam devu sovu Goru; jys ness tautom taisneibu. Jys naklaigōs un napaceļs bolsa, jō saucīņs nabyus dzēržams uz īlas. Aizlyuzušu nīdri jys nanūlauzs un nanūdzēss tikkū kvālojūšu dakti; jys sprīss tīsu pēc patīseibas. Jys nazaudēs degsmes un napagurs, koleidz nūstyprynōs vērs zemes taisneibu; un solas gaideis jō pamōceibas. Es, Kungs, tevi aicynōju taisneibā, jēmu tevi pi rūkas un tevi audzynōju, un nūstōdeju tevi ļaudim par dereibu un tautom par gaismu, lai tu atvārtu oklajim acis, lai nu nabreives izvastu gyustekņus un nu cītuma tūs, kas sēd tymsā.»

Tys ir Dīva vōrds.

 

PSALME 29 (28)

Refrens: Kungs svēteis sovu tautu. (R. 11b)

1 Dūdit Kungam, jyus, Dīva bārni,

dūdit Kungam gūdu un atzeistit jō spāku.

2 Dūdit Kungam jō vōrda gūdu,

pīlyudzit Kungu svātajā spūžumā.

Refrens

3 Kunga bolss pōr yudinim,

Kungs pōr yudiņu plašumim!

4 Kunga bolss ir varons,

Kunga bolss ir pylns cīneibas.

Refrens

3 Īsarunōja varonais Dīvs;

9 un jō svētneicā vysi teice jō gūdu.

10 Kungs mōjoj vērs yudiņu plašumim,

un kai karaļs Kungs sēdēs uz myužim.

Refrens

 

ŪTRAIS LASEJUMS Apd 10, 34 - 38

Jezus ir svaideits ar Svātū Goru.

LASEJUMS NU APOSTOLU DORBIM

Tymā laikā:

Pīters sōce runōt, saceidams: «Patīši, es atzeistu, ka Dīvs naškiroj cylvākus pēc personas, bet ikvīnā tautā jam pateikams ir tys, kurs jō beistās un dora pēc taisneibas. Jys syuteja vēsti Izraeļa bārnim, pasludynōdams mīru caur Jezu Kristu: jys ir Kungs pōr vysim. Jums ir zynoms, kas rysynōjos vysā Judejā, sōcūt ar Galileju, pēc Jōņa sludynōtōs kristeibas, – kai Dīvs svaideja Svātajā Gorā un spākā Jezu nu Nazaretes, kas staigōja lobu dareidams un dzīdynōdams vysus valna apsāstūs, tōdēļ ka Dīvs beja ar jū.»

Tys ir Dīva vōrds.

 

PYRMSEVANGELIJA DZĪDŌJUMS Sal. Mk 9, 6

Alleluja.

Atsavēre dabasi, un atskanēja Tāva bolss:

«Šys ir muns mīļōtais Dāls, kuru jums byus

klauseit.»

Alleluja.

 

EVANGELIJS Mk 1, 6b - 11

Jezus kristeišona.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MARKS

Tymā laikā:

Jōņs sludynōja, saceidams: «Pēc manis nōk tys, kurs ir spēceigōks par mani un kuram es naasu cīneigs nūsalīcūt atraiseit jō kūrpu syksnas. Es jyusus kristeju ar yudini, bet jys jyusus kristeis Svātajā Gorā.» Un tamōs dīnōs atgōja Jezus nu Galilejas Nazaretes, un Jordanā Jōņs jū kristeja. Un tyuleņ, izkōpdams nu yudiņa, jys īraudzēja dabasus atvārtus un Goru leidzeigi bolūžam nūsalaižūt un palīkam pōr jū. Un nu dabasim atskanēja bolss: «Tu esi muns mīlais Dāls, tu esi maņ pateikams.»

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze