Menu:














 


svātdĪna, 5. novembris

PYRMAIS LASEJUMS Mal 1, 14b-2, 2b. 8-10

Vacōs Dereibas nauzticeigī prīsteri.

LASEJUMS NU PRAVĪŠA MALAHIJA GRŌMOTAS

«Es asu lels Kēneņš,» soka debesspulku Kungs, «un muns vōrds izsauc bailes tautu vydā.» Bet tagad jums, ak prīsteri, šei pavēle: «Jo jyus nagribēsit klauseit un tū naliksit sev pi sirds, ka jums nōkās gūdōt munu vōrdu, soka debesspulku Kungs, es jums uzsyuteišu lōstu.» «Jyus nūkleidot nu ceļa, daudzus nūvedet leidz Lykuma pōrkōpšonai, lauzet Levi dereibu,» soka debesspulku Kungs. «Tōpēc ari es jyusus atdevu nīvom un pazamōjumim storp vysim ļaudim, tai kai jyus nasaturējot pi munim celim un škirōjot cylvākus pēc personas lykuma lītōs.» Vai tod mums vysim nav vīns tāvs? Vai tod na vīns Dīvs myusus ir radejis? Tod kōpēc kotrs nu mums krōp sovu brōli, pōrkōpdams myusu tāvu dereibu?

Tys ir Dīva vōrds.

 

PSALME 131 (130)

Refrens: Dīvs, sorgoj munu dvēseli.

1 Kungs, muna sirds nav lapna,

un munas acis nav augši pacaltas.

Es nasadzanu pēc lelom lītom

un pēc tō, kas pōrsnādz munus spākus.

Refrens

2 Bet gon mīreigu un klusu

es dareju sovu dvēseli;

kai mozs bārns sovas mōtes klēpī,

kai mozs bārns, tai manī ir muna dvēsele.

Refrens

3 Lai Izraeļs cerej uz Kungu

nu šō laika un myužam.

Refrens

 

ŪTRAIS LASEJUMS 1 Tes 2, 7b-9. 13

Pōvula apostolata sekmeigums.

LASEJUMS NU SVĀTŌ APOSTOLA PŌVULA PYRMŌS VĒSTULES TESALONIKĪŠIM

Brōli:

Storp jums mes bejom pylni pazemeibas, kai mōte, kas ryupejās par sovim bārnim. Tai mīļōdami jyusus, mes korsti vēlējomēs jums dūt na tikai Dīva Evangeliju, bet ari myusu dvēseles, cik dōrgi jyus bejot mums klivuši. Jyus taču atceratēs, brōli, myusu dorbu un pyules. Mes strōdōjom dīnu un nakti, lai nivīnu nu jums naapgryutynōtu, un tai jums sludynōjom Dīva Evangeliju. Tōpēc mes bez mitēšonōs pasateicam Dīvam par tū, ka pījamūt nu mums Dīva vōrdu, jyus tū uzjēmet na kai cylvāku vōrdu, bet kai tys patīseibā ir – kai Dīva vōrdu, kas ari dorbojās jyusūs, kas tycat.

Tys ir Dīva vōrds.

 

PYRMSEVANGELIJA DZĪDŌJUMS Mt 23, 9a.10b

Alleluja.

Vīns ir jyusu Tāvs, kas ir dabasūs,

un vīns ir jyusu Mōceitōjs – Kristus.

Alleluja.

 

EVANGELIJS Mt 23, 1-12

Jī soka, bet poši nadora...

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Jezus runōja ļaudim un sovim mōceklim, saceidams: «Mozus krāslā ir apsasāduši Rokstu zynōtōji un farizeji. Tōpēc vysu, kū jī jums soka, dorit un jemit vārā, bet pēc jūs dorbim nadorit, jō jī gon soka, bet poši nadora. Jī sasīn smogas un napanasamas nostas un uzkraun tōs cylvākim placūs, bet poši nagryb pat ar pērstu tōs kustynōt. Un vysus sovus dorbus jī dora tōpēc, lai ļaudis tūs radzātu: jī taisa plotōkas lyugšonu syksnas un pagarynoj puškus pi drēbem, mīļoj pyrmū vītu mīlastūs un pyrmūs sēdekļus synagogōs; jim pateik byut sveicynōtim tērga laukumūs un nu ļaudim sauktīs par «Rabbi». Bet jyus naļaunit sevi saukt par «Rabbi», jo tikai vīns ir jyusu Mōceitōjs, bet jyus vysi asat brōli. Un nivīnu nasaucit vērs zemes par Tāvu, jo tikai vīns ir jyusu Tāvs, kas ir dabasūs. Un napīkreitit sevi saukt par Mōceitōjim, jō vīns ir jyusu Mōceitōjs – Kristus. Kas ir lelōkais storp jums, tys lai ir jyusu kolps. Bet, kas sevi paaugstynōs, tys tiks pazamynōts, un kas sevi pazamynōs – tys tiks paaugstynōts.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze