Menu:














 


SVĀTDĪNA ZĪMASSVĀTKU OKTAVĀ, 31. decembris

SVĀTŌ GIMINE – JEZUS, MARIJA UN JEZUPS

Svātki

PYRMAIS LASEJUMS Sir 3, 3 - 7. 14 - 17a

Dīvbejeigais gūdoj savus vacōkus.

LASEJUMS NU SIRAHA DĀLA GRŌMOTAS

Dīvs ir pagūdynōjis tāvu caur bārnim un pōr dālim nūstyprynōjis mōtes tīseibas. Kas sovu tāvu gūdoj, tys īgyus grāku atlaisšonu un pasorgōs sevi nu tim, un lyugšonas laikā tiks uzklauseits. Un taipat dōrgumu krōjējam leidzeigs ir tys, kas tur cīnā sovu mōti. Kas sovu tāvu gūdoj, tys redzēs prīcu nu sovim bārnim, un jō lyugšonas tiks uzklauseitas. Kas sovu tāvu tur cīnā, tys dzeivōs ilgu myužu; un kas tāvam ir paklauseigs, tys īprīcynoj sovu mōti. Dāls, atbolsti sovu tāvu vacumdīnōs un naskumdynoj jū jō myužā. Un pat jo prōts jam mozynojās, esi īcīteigs un nanycynoj jū nivīnā nu jō myuža dīnom. Jo žāļsirdeiba pret tāvu natiks aizmērsta; grāku vītā tei īmōjōs tevī un tiks īskaiteita kai taisneigums.

Tys ir Dīva vōrds.

 

PSALME 128 (127)

Refrens: Svēteigi ir tī, kas Kunga beistās. (R. sal. 1)

1 Svēteigs ir ikvīns, kas Kunga beistās,

kas staigoj jō ceļus.

2 Tu ēssi nu sova rūku dorba,

tu byusi laimeigs un tev labi klōsīs.

Refrens

3 Tova sīva kai augleigs veina kūks

tova noma sīnōs.

Tovi bārni kai eļļas kūka atvases

ap tovu goldu.

Refrens

4 Raug, tai tiks svēteits cylvāks,

kas Kunga beistās.

5 Lai Kungs tevi svētej nu Siona,

ka tu radzātu Jeruzalemes labklōjeibu vysōs sova

myuža dīnōs.

Refrens

 

ŪTRAIS LASEJUMS Kol 3, 12 - 21

Kristeigī principi gimines dzeivī.

LASEJUMS NU SVĀTŌ APOSTOLA PŌVULA VĒSTULES KOLOSĪŠIM

Brōli:

Kai Dīva izradzātī, svātī un mīļōtī, īsatērpit sirsneigā žāļsirdeibā, laipneibā, pazemeibā, lānprōteibā un pacīteibā. Esit vīns pret ūtru īcīteigi un cyts cytam pīdūdit, jo vīnam ir kū syudzētīs par ūtru; taipat kai Kungs Jezus jums ir pīdevis, pīdūdit ari jyus. Bet pōri vysam tam īsatērpit mīlesteibā, kas ir piļneibas saite! Un Kristus mīrs lai volda jyusu sirdīs, jo tam jyus asat aicynōti kai vīna mīsa. Esit pateiceigi. Kristus vōrds lai bogōteigi mōjoj jyusu vydā, pamōcit un paskubynojit cyts cytu vysā gudreibā ar psalmem, himnom un goreigom dzīsmem, žēlesteibas īspaidā dzīžūt Dīvam sovōs sirdīs. Un vysu, kū vīn jyus dorot vōrdūs vai dorbūs, vysu dorit Kunga Jezus Kristus vōrdā, pasateikdami caur jū Dīvam Tāvam. Sīvas, esit padeveigas sovim veirim, kai tam jobyun Kunga vōrdā. Veiri, mīļojit sovas sīvas un naesit skorbi pret jōm. Bārni, esit paklauseigi sovim vacōkim vysōs lītōs, jo tys pateik Kungam. Tāvi, nakaitynojit sovus bārnus, lai jī nazaudej goru.

Tys ir Dīva vōrds.

 

PYRMSEVANGELIJA DZĪDŌJUMS Kol 3, 15a. 16a

Alleluja.

Kristus mīrs lai volda jyusu sirdīs;

Kristus vōrds lai bogōteigi mōjoj jyusu vydā.

Alleluja.

 

EVANGELIJS  Lk 2, 22 - 40

Bārns auga gudreibas pylns.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Kod beja pagōjušas lykumā nūteiktōs škeisteišonas dīnas, vacōki nese Jezu uz Jeruzalemi, lai jū stōdeitu Kungam prīškā, kai ir raksteits Kunga lykumā: «Kotrs veirīšu kōrtas pyrmdzymtais lai teik veļteits Kungam»; un lai uparātu, kai saceits Kunga lykumā, «vīnu pōri ūbeļu vai divus jaunus bolūžus». Un, lyuk, Jeruzalemē beja cylvāks, vōrdā Simeons. Šys cylvāks beja taisneigs un dīvbejeigs un gaideja īprīcynōjumu Izraeļam, un ar jū beja Svātais Gors. Jys beja sajēmis nu Svātō Gora atklōsmi, ka namērs, cikom nabyus redzējis Kunga Svaideitū. Gora pamudynōts, jys īgōja svētneicā. Un, kod vacōki īnese bārnu Jezu, lai pōr jū izpiļdeitu Lykuma prīkšrokstus, jys jēme jū sovōs rūkōs, slavēja Dīvu un saceja: «Tagad nu atlaid, Kungs, sovu kolpu mīrā, kai tu esi sacejis, jo munas acis ir skatejušas tovu pesteišonu, kū tu esi sagatavōjis vysu tautu prīškā: gaismu pogōnu apgaismōšonai un slavi sovai Izraeļa tautai.» Jō tāvs un mōte breinējos par tū, kas tyka saceits par bārnu. Un Simeons jūs svēteja un saceja Mōtei Marijai: «Raug, jys ir lykts par krisšonu un augšanceļšonūs daudzim Izraelī un par zeimi, kam runōs pretim, lai atsaklōtu daudzu siržu dūmas. Un tev pošai dvēseli pōrdūrs zūbyns.» Tur beja pravīte Anna, Fanueļa meita, nu Asera ciļts, godūs ļūti vaca, pēc sovas jauneibas dzeivōjuse septeņus godus ar sovu veiru un palykuse atraitne. Jei beja nūdzeivōjuse leidz ostoņdesmit četrim godim, nasaškērdama nu svētneicas, kur dīnom un naktim kolpōja Dīvam ar gavēnim un lyugšonom. Ari jei, atnōkuse tamā pošā stuņdē, slavēja Dīvu un stōsteja par bārnu vysim, kas gaideja Jeruzalemes atpesteišonu. Izpiļdejuši vysu pēc Kunga lykuma, jī atsagrīze Galilejā, sovā piļsātā Nazaretē. Bet bārns auga, kliva styprs un gudreibas pylns, un Dīva žēlesteiba beja pōr jū.

Tys ir Kunga vōrds.

Voi eisōk: Lk 2, 22. 39 - 40

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Kod beja pagōjušas Mozus lykumā nūteiktōs škeisteišonas dīnas, vacōki nese Jezu uz Jeruzalemi, lai jū stōdeitu Kungam prīškā. Izpiļdejuši vysu pēc Kunga lykuma, jī atsagrīze Galilejā, sovā piļsātā Nazaretē. Bet bārns auga, kliva styprs un gudreibas pylns, un Dīva žēlesteiba beja pōr jū.

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze