Menu:














 

catūrtdīna, 2. novembris

VYSU TICEIGŪ MYRUŠŪ PĪMIŅAS DĪNA

PYRMŌ MISE

PYRMAIS LASEJUMS Ij 19, 1. 23-27a

Ijaba cereiba.

LASEJUMS NU IJABA GRŌMOTAS

Ijabs saceja:

«Kas maņ tū dūs, ka tyktu uzraksteitas munas runas? Kas maņ tū dūs, ka tōs tyktu īraksteitas grōmotā ar dzeļža vai svyna irbuli, uz myužim tyktu īkoltas akminī? Tūmār es zynu, ka muns Pesteitōjs dzeivoj un postorā laikā jys nūsastōs pōr tryudim; un pēc tam munus tryudus apviļks ar ōdu, un sovā mīsā es redzēšu Dīvu. Es pats jū redzēšu, un munas acis jū skateis.»

Tys ir Dīva vōrds.

 

PSALME 27 (26)

Refrens: Es redzēšu Kunga lobumu dzeivū zemē. (R. sal. 13)

1 Kungs ir muna gaisma un muns glōbējs,

nu kō maņ beitīs?

Kungs ir munas dzeiveibas sorgs,

par kū maņ baiļōtīs?

Refrens

4 Vīnu es lyudzu nu Kunga, tik tū es vēlejūs,

ka varātu dzeivōt Kunga nomā

vysōs sova myuža dīnōs,

lai radzātu Kunga laipneibu un ītu jō svētneicā.

Refrens

7 Uzklausi, Kungs, munu bolsu, kod es saucu uz tevi,

apsažāloj par mani un uzklausi mani.

8 Kungs es mekleju tovu vaigu.

9 Naapslēp tū nu manis.

Refrens

13 Es tycu, ka varēšu redzēt Kunga lobumu dzeivū zemē.

14 Gaidi uz Kungu un asi drūsmeigs,

esi styprs sovā sirdī un cerej uz Kungu.

Refrens

 

ŪTRAIS LASEJUMS 1 Kor 15, 20-27a. 28

Kristū vysi kļyus dzeivi.

LASEJUMS NU SVĀTŌ APOSTOLA PŌVULA PYRMŌS VĒSTULES KORINTĪŠIM

Brōli:

Kristus ir augšancēlīs nu myrūnim, jys kai pyrmais nu myrušajim; tōdēļ ka caur cylvāku nōce nōve, un caur cylvāku – myrušū augšanceļšonōs: jo kai vysi mērst Odumā, tai vysi otkon kļyus dzeivi Kristū. Tūmār kotrs pēc kōrtas: vyspyrms Kristus, tod jō atnōkšonas dīnā tī, kas Kristum pīdar. Pēc tam nōks gols, kod jys nūdūs vaļdeišonu Dīvam un Tāvam. Bet jam pīsanōk vaļdeit, koleidz vysus īnaidnīkus byus nūlicis zam sovom kōjom. Bet kai pādejais īnaidnīks tiks satrīkta nōve; «jo vyss ir pakļauts zam jo kōjom». Un, kod jam vyss byus pakļauts, tod ari Dāls pats pasakļaus tam, kas jam beja pakļōvis vysu, lai Dīvs vysā byutu vyss.

Tys ir Dīva vōrds.

 

PYRMSEVANGELIJA DZĪDŌJUMS Sal. Atkl 1, 5-6

Alleluja.

Jezus Kristus ir pyrmdzymtais storp myrušajim;

jam gūds un vara myužu myužūs. Amen.

Alleluja.

 

EVANGELIJS Lk 23, 44-46. 50. 52-53; 24, 1-6a

Kristus nōve un augšanceļšonōs.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Beja jau ap sastū stuņdi. Un tymsa apklōja vysu zemi leidz pat deveitajai stuņdei. Un aptymsa saule, un svētneicas aizkors pōrpleisa vydā pušu. Tod Jezus īsasauce skaļā bolsā, saceidams: «Tāvs, tovōs rūkōs es atdūdu sovu goru.» Un, lyuk, tur beja kaids veirs, vōrdā Jezups, kas beja Augstōs Padūmes lūceklis. Jys aizgōja pi Pilata un lyudze Jezus mīsu. Un nūjēmis jys ītyna tū audaklā un paguļdeja izcērstā kopā, kurā nivīns vēļ nabeja guļdeits. Nedeļas pyrmajā dīnā, gaismai austūt, sīvītes atnōce pi Kristus kopa, nasūt sagatavōtōs smaržzōles, un atroda akmini nu kopa atvaltu. Īgōjušas īkšā, jōs naatroda Kunga Jezus Mīsu. Un nūtyka, ka, jom asūt par tū naziņā, lyuk, divi veiri spūžōs drēbēs nūsastōja jom blokus. Bet, kod jōs pōrsabeidušas nūlaide acis uz zemi, tī jōm saceja: «Kōpēc jyus dzeivū meklejat storp myrušajim? Jō šeit nav. Jys ir augšancēlīs.»

Tys ir Kunga vōrds.

 

ŪTRŌ MISE

PYRMAIS LASEJUMS Dan 12, 1-3

Vyspōrejō augšanceļšonōs.

LASEJUMS NU PRAVĪŠA DANIEĻA GRŌMOTAS

Tymā laikā ceļsīs Mihaeļs, lels vaļdnīks, kas aizstōv tovas tautas bārnus. Un pīnōks spaidu laiki, kaidi nav bejuši nu breiža, kūpš sōce pastōvēt tautas, leidz pat šam mirkļam. Un šymūs laikūs tiks atpesteita tova tauta, kotrs, kas izarōdeis īraksteits grōmotā. Un daudzeji nu tim, kas guļ zemes putekļūs, pasamūss: vīni myužeigajai dzeivei un cyti myužeigam kaunam. Bet tī, kas byus mōceiti, mirdzēs kai dabasu spūžums, un tī, kas daudzejim byus īmōcejuši taisneibu, byus kai zvaigznes uz myužeigim laikim.

Tys ir Dīva vōrds.

 

PSALME 42 (41)

Refrens: Muna dvēsele ilgojās pēc dzeivō Dīva. (R. sal. 3a)

2 Kai brīdis slōpst pēc yudiņa olūtim,

tai muna dvēsele ilgojās pēc tevis, Dīvs.

Refrens

3 Muna dvēsele slōpst pēc Dīva, pēc dzeivō Dīva;

kod es īšu un nūsastōšu Dīva vaiga prīškā?

Refrens

5 Jo es asu gōjis uz breinišíū teļti,

uz Dīva nomu ar pateiceibu un līksmom dzīsmem.

Refrens

 

ŪTRAIS LASEJUMS Rom 6, 3-9

Jo mes asam nūmyruši kūpā ar Kristu,

mes ari dzeivōsim kūpā ar jū.

LASEJUMS NU SVĀTŌ APOSTOLA PŌVULA VĒTULES ROMĪŠIM

Brōli:

Vai tod jyus nazynot, ka mes vysi, kas asam kristeiti Kristū Jezū, asam kristeiti jō nōvē? Kristeibā mes leidz ar jū asam apbēdeiti nōvei, lai ari mes īītu jaunā dzeivē, taipat kai Kristus ir uzmūdynōts nu myrūnim ar Tāva gūdeibas spāku. Jo nu mes asam īdēsteiti jō nōves leidzeibā, mes byusim jam leidzeigi ari augšanceļūtīs. Mes zynom, ka vacais cylvāks myusūs ir reizē ar jū pīkolts krystā, lai tyktu iznycynōta grākam pakļautō mīsa, un mes vairs nakolpōtu grākam. Jo, kas ir miris, tys ir atbreivōts nu grāka. Bet, jo mes asam nūmyruši kūpā ar Kristu, mes tycam, ka ari dzeivōsim kūpā ar jū, zynōdami, ka Kristus, pīsacēlis nu myrūnim, vairs namērst. Nōvei vairs nav varas pōr jū.

Tys ir Dīva vōrds.

 

PYRMSEVANGELIJA DZĪDŌJUMS Jņ 3, 16

Alleluja.

Dīvs tai mīļōja pasauli, ka atdeve sovu vīnpīdzymušū Dālu;

ikvīns, kas jam tic, īgyust myužeigū dzeivi.

Alleluja.

 

EVANGELIJS Jņ 11, 32-45

Lazara pīceļšona nu myrūnim.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS JŌŅS

Kod Marija nūnōce tur, kur beja Jezus, jei, īraudzejuse jū, nūkryta jam pi kōjom un jam saceja: «Kungs, jo tu byutu bejis šeit, muns brōļs nabyutu nūmiris!» Tod Jezus, radzūt raužam jū un ari jūdus, kas beja atnōkuši jai leidza, tyka gorā saviļņōts un ļōvēs aizkustynōjumam. Un jys jautōja: «Kur jyus jū nūlykot?» Jī atbiļdēja jam: «Kungs, nōc un pasaskoti.» Jezus sōce raudōt. Bet jūdi saceja: «Lyuk, kai jys jū mīļōja!» Bet daži nu jim teice: «Vai tod jys, kurs atvēre acis oklajam, navarēja izdareit tai, lai šys nanūmērtu?» Bet Jezus, otkon sevī saviļņōts, pīgōja pi kopa. Tei beja ola, un tai vērsum beja uzlykts akmiņs. Jezus saceja: «Nūjemit akmini!» Marta, nūmyrušō mōsa, jam teice: «Kungs, jys jau smokoj, jo četras dīnas, kai jys jau kopā!» Jezus jai saceja: «Vai tod es nateiču, ka redzēsi Dīva gūdeibu, jo ticēsi?» Tod jī nūjēme akmini. Bet Jezus, pacēlis acis uz augšu, saceja: «Tāvs, es tev pasateicu, ka tu mani uzklauseji. Es tūmār zynōju, ka tu mani vīnmār uzklausi, bet es tū saceju apkōrtstōvūšū ļaužu dēļ, lai jī ītycātu, ka tu mani syuteji.» Un, tū pateicis, jys skaļā bolsā īsasauce: «Lazar, nōc ōrā!» Myrušais, audaklūs sasītom rūkom un kōjom, izgōja ōrā. Jō seja beja apsagta ar svīdrautu. Jezus jim saceja:  «Atraisit jū un ļaunit jam īt.» Tod daudzi nu jūdim, kas beja atnōkuši pi Marijas un redzēja, kū jys izdareja, īticēja jam.

Tys ir Kunga vōrds.

 

TREŠŌ MISE

PYRMAIS LASEJUMS Gudr 3, 1-6. 9

Dīvs ir pījēmis taisneigūs kai dadzynojamō upura dōvonu.

LASEJUMS NU GUDREIBAS GRŌMOTAS

Taisneigū dvēseles ir Dīva rūkā, un nōves mūkas jūs naskars. Nasaprōteigū acim jī lykōs myruši, un jūs nōve tyka uzskateita par nalaimi, jūs aizīšona nu mums lykōs izniceiba, bet jī ir īgōjuši mīrā. Lai gon pēc cylvāku dūmom jī izcīte mūkas, tūmār jūs cereiba ir pylna namērsteibas. Nadaudz nu jim ir praseits, bet daudz tiks īdūts, jo Dīvs ir jūs pōrbaudejis un atradis par sevis cīneigim. Jys ir pōrbaudejis jūs kai zaltu kausejamā ceplī un jūs pījēmis kai dadzynojamō upura dōvonu. Tī, kas pasaļaun uz jū, saprass patīseibu, un uzticeigī paliks jō mīlesteibā, tōdēļ ka jys ar žēlesteibu apveļtej sovus svātūs un sovus izradzātūs apmekļej.

Tys ir Dīva vōrds.

 

PSALME 103 (102)

Refrens: Taisneigim pesteišona nōk nu Dīva. (R. sal. Ps 37, 39a)

8 Kungs ir žālsirdeigs un labvēleigs,

lānprōteigs un ļūti saudzeigs.

10 Jys nadora mums pēc myusu grākim

un naatmoksoj mums pēc myusu vainem.

Refrens

13 Kai tāvs žāloj sovus bārnus,

tai apsažāloj Kungs par tim, kas jū gūdoj.

14 Jo jys zyna, nu kō mes radeiti,

jys atcerās, ka asam puteklis.

Refrens

15 Cylvāka dīnas kai nūpļauta zōle,

jys nūzīd leidzeigi pučei uz lauka.

16 Kod vējs jam uzpyuš, jō vairs nabyus

un jō vīta jō vairs napazeis.

Refrens

17 Bet Kunga žāļsirdeiba pastōv myužu myužūs

pōr tim, kas jō beistās.

Jō taisneiba palīk paaudzēs

18 tim, kas jō dereibu globoj.

Refrens

 

ŪTRAIS LASEJUMS 2 Kor 4, 14 - 5, 1

Radzamais ir pōrejūšs, bet naradzamais ir myužeigs.

LASEJUMS NU SVĀTŌ APOSTOLA PŌVULA ŪTRŌS VĒSTULES KORINTĪŠIM

Brōli:

Mes zynom, ka tys, kurs uzmūdynōja Kungu Jezu, uzmūdynōs ari myusus kūpā ar Jezu un nūstōdeis sev prīškā kūpā ar jums. Jo tys vyss ir jyusu dēļ, lai pōrbogōtō žēlesteiba daudzu pateiceibas dēļ vairōtu Dīva gūdu. Tōpēc mes napagurstam. Lai gon myusu ōrejais cylvāks izneikst, myusu īkšejais tūmār atsajaunoj nu dīnas dīnā. Myusu pošreizejōs gryuteibas, kas ir vīglas, sagōdoj mums naizsokami lelu gūdeibu myužeibā. Mes taču raugomēs navys uz radzamū, bet gon uz naradzamū, jō radzamais ir pōrejūšs, bet naradzamais ir myužeigs. Jo mes zynom: jo myusu laiceigōs dzeives miteklis sabryuk, tod nu Dīva mums debesīs ir myužeigōs mōjas, kas nav ar rūkom caltas.

Tys ir Dīva vōrds.

 

PYRMSEVANGELIJA DZĪDŌJUMS Sal. Jņ 6, 40

Alleluja.

Taida ir muna Tāva gryba,

lai ikvīnam, kas tic Dālam, byutu myužeigō dzeive.

Alleluja.

 

EVANGELIJS Jņ 14, 1-6

Muna Tāva nomā mōjūkļu ir daudz.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS JŌŅS

Tymā laikā Jezus saceja sovim mōceklim:

«Lai jyusu sirdis nasabeist. Jyus tycat Dīvam, ticit ari maņ. Muna Tāva nomā mōjūkļu ir daudz. Jo tai nabyutu, vai tod es byutu jums teicis, ka eju sagatavōt jums vītu? Un, kod es aizīšu un sagatavōšu jums vītu, es nōkšu otkon atpakaļ un pajimšu jyusus sev leidza, lai tur, kur asu es, byutu ari jyus. Un jyus zynot ceļu, uz kurīni es eju.» Toms jam saceja: «Kungs, mes nazynom, uz kurīni tu ej. Kai tod mes varim zynōt ceļu?» Jezus jam atbiļdēja: «Es asu ceļš, patīseiba un dzeiveiba. Nivīns nanūnōk pi Tāva cytaidi, kai tikai caur mani.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze