Menu:














 


svātdĪna, 29. oktobris

PYRMAIS LASEJUMS Izc 22, 20-26

Dīvs dzērd cītēju syudzeibas.

LASEJUMS NU IZCEĻŌŠONAS GRŌMOTAS

Tai soka Kungs:

«Tev nabyus apspīst svešinīku, ni ari jū apgryutynōt, jo ari jyus poši bejot īnōcēji Egiptes zemē. Jums nabyus dareit pōri atraitnei un bōrinim. Jo jyus tim nūdareisit pōri, jī skali sauks uz mani, un es dzērdēšu jū klīdzīņus; un munas dusmes īsadegs, un es jyusus iznycynōšu ar zūbynu, un jyusu sīvas kļyus par atraitnem un jyusu bārni par bōrinim. Jo tu aizdūsi naudu tryuceigajam munā tautā, kurs dzeivoj tev blokus, tod naesi jam kai augļōtōjs. Jums nabyus nu jō atpraseit ar uzveju. Jo tu pajimsi kīlā nu sova tyvōkō mēteli, tod pyrms saules rīta atdūsi jam atpakaļ, jo tys ir vīneigais jō mīsas apgērbs, ar kū apsasegt, un jam nav nikō cyta, kurā jys varātu gulēt. Jo jys sauks uz mani, es jū uzklauseišu, tōdēļ ka asu žāļsirdeigs.»

Tys ir Dīva vōrds.

 

PSALME 18 (17)

Refrens: Es mīļoju tevi, Kungs, muns styprums! (R. 2b)

2 Es mīļoju tevi, Kungs, muns styprums!

3 Kungs, muns atbolsts, muns patvārums un muns glōbējs,

muns Dīvs, muna kliņts, uz kuru es cereju;

muns vairūgs, munas pesteišonas rogs un muns aizstōvis.

Refrens

4 Es pīsaukšu slaves cīneigū Kungu

un byušu glōbts nu munim īnaidnīkim.

47 Lai dzeivoj Kungs! Muns Glōbējs lai ir slaveits,

lai cyldynōts ir Dīvs, muns Pesteitōjs!

51 Lelas uzvaras tu esi devis sovam kēneņam

un parōdējis žāļsirdeibu sovam Svaideitajam.

Refrens

 

ŪTRAIS LASEJUMS 1 Tes 1, 5c-10

Jyus atsagrīzet pi Dīva, lai kolpōtu Dīvam un gaideitu jō Dālu.

LASEJUMS NU SVĀTŌ APOSTOLA PŌVULA PYRMŌS VĒSTULES TESALONIKĪŠIM

Brōli:

Jyus jau zynot, kaidi mes jums bejom jyusu dēļ. Un jyus ar Svātō Gora prīcu, pījimdami vōrdu lelūs spaidūs, asat klivuši myusu un Kungu sekōtōji, tai lai jyus palyktu paraugs vysim ticeigajim Makedonijā un Ahajā. Jo nu jums Kunga mōceiba ir izaplatejuse na tikai Makedonijā un Ahajā, bet ari vysōs vītōs jyusu ticeiba Dīvam ir klivuse zynoma, tai ka mums pat navajag kaut kū stōsteit, jo jī poši stōsta par mums, kaida beja myusu īsarasšona pi jums un kai jyus nu dīvaklim atsagrīzet pi Dīva, lai kolpōtu dzeivajam un patīsajam Dīvam un gaideitu nu dabasim jō Dālu, kuru jys izmūdynōja nu myrūnim, Jezu, kas myusus glōb nu nōkamōs dusmeibas.

Tys ir Dīva vōrds.

 

PYRMSEVANGELIJA DZĪDŌJUMS Jņ 14, 23

Alleluja.

Kas mani mīļoj, tys piļdeis munus vōrdus,

un muns Tāvs jū mīļōs, un mes pi jō nōksim.

Alleluja.

 

EVANGELIJS Mt 22, 34-40

Vyssvareigōkō bausleiba.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Farizeji, dzēržūt, ka Jezus saducejus beja pīspīdis apklust, sasapuļcēja kūpā. Un vīns nu jim, Lykuma zynōtōjs, jautōja Jezum, jū pōrbaudeidams: «Mōceitōj, kura bausleiba Lykumā ir vyslelōkō?» Un Jezus jam atbiļdēja: «Tev byus mīļōt Kungu, sovu Dīvu, ar vysu sovu sirdi, ar vysu sovu dvēseli un ar vysu sovu prōtu. Tei ir pyrmō un vyslelōkō bausleiba. Bet ūtra ir tai leidzeiga: Tev byus mīļōt sovu tyvōkū kai sevi pošu. Šymōs divōs bausleibōs ir ītvarts vyss Lykums un Pravīši.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze