Menu:














 

trešdĪna, 28. februars

 

PYRMAIS LASEJUMS Jer 18, 18–20

Vojōtō Jeremija Lyugšona.

LASEJUMS NU PRAVĪŠA JEREMIJA GRŌMOTAS

Jī saceja: «Nōcit un sasazvērēsim pret Jeremiju! Tōdēļ ka prīsteram gon jau napītryuks pamōceibas un gudrinīkam padūma, ni pravīšam volūdas. Nōcit un satrīksim jū ar mēli un nivīnu jō vōrdu najimsim vārā!» Kungs, pasaskoti uz mani un īsaklausi munu pretinīku bolsā! Vai tod ar ļaunu tiks atmoksōts par lobu, ka jī ir izrokuši bedri munai dvēselei? Pīmiņ, ka es stōvēju tovā prīškā, lai par jim saceitu lobu un nūvārstu nu jim tovas dusmas.

Tys ir Dīva vōrds.

 

PSALME 31 (30)

Refrens: Sovā žāļsirdeibā, Dīvs, atpestej mani. (R. 17b)

5 Tu mani izvessi nu slozda, kas maņ slapus izlykts,

jo tu esi muns styprums.

6 Tovōs rūkōs es atdūdu sovu goru;

tu atpesteji mani, Kungs, uzticeigais Dīvs.

Refrens

14 Jo dzērdēju daudzus sokūt malus:

«Brīsmes vysapkōrt!»,

kod tī puļcējōs kūpā pret mani,

gudrōja atjimt maņ dzeiveibu.

Refrens

15 Bet es pasaļōvu uz tevi, Kungs;

es saceju, muns Dīvs tu esi,

16 tovōs rūkōs ir muns liktiņs.

Izglōb mani nu munu īnaidnīku rūkas

un nu munim vojōtōjim.

Refrens

 

PYRMSEVANGELIJA DZĪDŌJUMS Sal. Jņ 8, 12b

Lai ir slaveits Dīva vōrds.

Es asu pasaules gaisma,

kas maņ sekoj, tam byus dzeiveibas gaisma.

Lai ir slaveits Dīva vōrds.

 

EVANGELIJS Mt 20, 17–28

Cylvāka Dāls tiks nūdūts nōvei pi krysta.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Jezus, ejūt uz Jeruzalemi, pajēme Divpadsmit mōcekļus sovrup un ceļā jim saceja: «Lyuk, mes ejam uz Jeruzalemi. Tur Cylvāka Dāls tiks nūdūts augstajim prīsterim un Rokstu zynōtōjim. Un tī jū nūtīsōs uz nōvi un atdūs jū pogōnim izsmīšonai, šausteišonai un pīkaļšonai krystā. Bet trešajā dīnā jys augšanceļsīs». Tod pi jō pīgōja Zebedeja dālu mōte ar sovim dālim, nūsamete zemē un nu jō kaut kū lyudze. Jys jautōja jai: «Kū tu vēlejīs?» Jei atbiļdēja: «Soki, lai šī divi muni dāli sādātu tovā vaļsteibā vīns tovā lobajā un ūtrs kreisajā pusē». Bet Jezus atbyldūt saceja: «Jyus nazynot, kū lyudzat. Vai jyus varit dzert bikeri, kas maņ byus jōdzer?» Jī atbiļdēja: «Mes varim». Jys saceja jim: «Munu bikeri jyus gon dzersit.Tūmār na maņ pīsanōk dūt vītu munā lobajā un kreisajā pusē, bet tū ījims tī, kurim tū ir sagatavōjis muns Tāvs.» Un desmit, tū dzēržūt, dusmōjās uz šim divim brōlim. Bet Jezus pīaicynōja jūs pi sevis un saceja: «Jyus zynot, ka tautu vaļdnīki volda pōr tōm un tī, kas ir leli, izmontoj varu pōr tōm. Storp jums tai nabyus. Bet, kurs storp jums gryb byut lels, tys lai ir jyusu kolps. Taipat ari Cylvāka Dāls nav nōcis, lai jam kolpōtu, bet lai pats kolpōtu un atdūtu sovu dzeiveibu daudzu atpērkšonai.»

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze