PYRMAIS LASEJUMS Is 1, 10. 16–20
Beidzit nakrītni reikōtīs, mōcitēs dareit lobu.
LASEJUMS NU PRAVĪŠA ISAJA GRŌMOTAS
Klausitēs Kunga vōrdu jyus, Sodomas
lelveiri, myusu Dīva lykumam atverit ausis jyus, Gomoras ļaudis! «Mozgojitēs,
esit teiri! Aizvōcit prūjom nu munom acim sovu dorbu ļaunumu. Beidzit nakrītni
reikōtīs, mōcitēs dareit lobu: meklejit taisneibu, paleidzit apspīstam, atbolstit
bōrini, aizstōvit atraitni! Tod nōcit, sprīssim tīsu,» soka Kungs. «Kaut ari
jyusu grāki byutu kai karmins, tī kļyus bolti kai snīgs, un kaut ari tī byutu
sorkani kai purpurs, tī paliks kai vylna. Jo jyus īgribēsit un paklauseisit, jyus
baudeisit zemes lobumus, bet, jo pretōsitēs un mani īvessit dusmēs, tod jyusus
apreis zūbyns. Tōdeļ ka Kunga mute tai ir teikuse.»
Tys ir Dīva vōrds.
PSALME 50 (49)
Refrens: Pesteišonu
Dīvs dōvōs taisneigajim. (Sal. 23b)
8 «Es
navainōšu tevi par tovim upurim,
jo tovi dadzynojamī upuri ir vīnmār munā
prīškā.
9 Es
najimšu teļus nu tova noma,
ni ari ōžus nu tova gonompulka.»
Refrens
16 «Kōpēc
tu daudzynoj munas bausleibas
un ar sovu muti pīmini munu dereibu.
17 Pamōceibas
tu īneidi
un munus vōrdus aizmeti prūjom aiz
sevis.
Refrens
21 Tu tū
dareji, bet es klusēju.
Tu dūmōji, ka asu tev leidzeigs?
23 Kas
ness slaves upuri, tys gūdynōs mani,
un kas naaptraipeits staigoj ceļu,
tam es rōdeišu Dīva pesteišonu.»
Refrens
PYRMSEVANGELIJA DZĪDŌJUMS Ez 18, 31
Lai ir slaveits Dīva vōrds.
Atmetit vysas sovas nūzīdzeibas un grākus
un veidojit sev jaunu sirdi un jaunu
goru.
Lai ir slaveits Dīva vōrds.
EVANGELIJS Mt 23, 1–12
Sorgojitēs nu lepneibas un līkuleibas.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā:
Jezus runōja ļaudim un sovim mōcekļim,
saceidams: «Mozus krāslā ir apsasāduši Rokstu zynōtōji un farizeji. Tōpēc vysu,
kū jī jums soka, dorit un jemit vārā, bet pēc jūs dorbim gon nadorit, jo jī gon
soka, bet poši nadora. Jī sasīn smogas un napanasamas nostas un uzkraun tōs
cylvākim placūs, bet poši nagrib pat ar pērstu tōs kustynōt. Un vysus sovus
dorbus jī dora tōpēc, lai ļaudis tūs radzātu: jī taisa plotōkas lyugšonu
syksnas un pagarynoj puškus pi drēbem, mīļoj pyrmū vītu mīlastūs un pyrmūs sēdekļus
sinagogōs. Jim pateik byut sveicynōtim tērga laukumūs un nu ļaudim sauktīs par
«Rabbi». Bet jyus naļaunit sevi saukt par «Rabbi», jo tikai vīns ir jyusu Mōceitōjs,
bet jyus vysi asat brōli. Un nivīnu nasaucit vērs zemes par tāvu, jo tikai vīns
ir jyusu Tāvs, kas ir dabasūs. Un napīkreitit sevi saukt par Mōceitōjim, jo vīns
ir jyusu Mōceitōjs – Kristus. Kas ir lelōkais storp jums, tys lai ir jyusu
kolps. Bet, kas sevi paaugstynōs, tys tiks pazamynōts, un kas sevi pazamynōs, tys
tiks paaugstynōts.»
Tys ir Kunga vōrds.