Menu:














 


svātdĪna, 27. AUGUSTS

PYRMAIS LASEJUMS                                                                                       Is 22, 19–23

Dāvida noma atslāga.

LASEJUMS NU PRAVĪŠA ISAJA GRŌMOTAS

Tū soka Kungs noma pōrvaļdnīkam Sebnam:

«Es tevi padzeišu nu tovas vītas un tevi atceļšu nu tova omota. Un tamā dīnā nūtiks, ka es aicynōšu sovu kolpu Eljakimu, Hilkija dālu, un īgērbšu jū tovā tārpā un jū apjūzšu ar tovu jūstu. Un jō rūkōs es nūdūšu tovu varu, un jys byus par tāvu Jeruzalemes īdzeivōtōjim un Judas nomam. Uz jō placa es uzlikšu Davida noma atslāgu. Kod jys atvērs, tod nabyus nivīna, kas aizslāgtu; kod jys aizslēgs, tod nabyus nivīna, kas atvārtu. Es īdzeišu jū kai vadzi drūšā vītā, un jys kļyus par gūdeibas trūni sova tāva nomam.»

Tys ir Dīva vōrds.

 

PSALME 138 (137)

Refrenss: Kunga žāļsirdeiba pastōv myužam. (R. Ps 103, 17)

1 Kungs, es teikšu tevi nu vysas sovas sirds,

jo tu uzklauseji munas mutes vōrdus.

Es dzīdōšu tev eņgeļu prīškā,

2 tovas svētneicas prīškā krisšu pi zemes.

Refrens

Un slaveišu tovu vōrdu

tovas žāļsirdeibas un uzticeibas dēļ,

jo tovu vōrdu un sūlejumu

tu paaugstynōji pōri vysam.

3 Tamā dīnā, kod pīsaukšu tevi, uzklausi mani,

vairoj munas dvēseles spākus.

Refrens

6 Jo Kungs ir dyžons, bet pazemeigū jys uzlyukoj

un lapnū jau nu tōlīnes pazeist.

8 Kungs, tova žāļsirdeiba pastōv myužam:

nanycynoj sovu rūku dorbu.

Refrens

 

ŪTRAIS LASEJUMS                                                                                      Rom 11, 33–36

Slaves dzīsme Dīva gudreibai.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Ak, Dīva zineibu un gudreibas, un bogōteibu dziļums! Cik naizdybynojami ir jō lāmumi un naizsekojami jō ceļi! Jo kas gon ir izpratis Kunga dūmas? Vai kas gon jam ir bejis par padūma devēju? Vai ari kas jam ir īprīkš kū dōvōjis, lai atpakaļ sajimtu atleidzeibu? Tōdēļ ka nu jō un caur jū, un jimā ir vyss. Slave jam uz myužim. Amen.

Tys ir Dīva vōrds.

 

PYRMSEVANGELIJA DZĪDŌJUMS                                                                                Mt 16, 18

Alleluja.

Tu esi Pīters, un uz šōs kliņts es uzceļšu sovu Bazneicu,

un eļnes vōrti tū nauzvarēs.

Alleluja.

 

EVANGELIJS                                                                                                                        Mt 16, 13–20

Es tev dūšu dabasu vaļsteibas atslāgas.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Jezus nūnōce Filipa Cezarejas rūbežōs. Un jys jautōja sovim mōceklim, saceidams: «Par kū ļaudis uzskota Cylvāka Dālu?» Un jī atbiļdēja: «Vīni par Jōni Kristeitōju, cyti par Eliju, un vēļ cyti par Jeremiju vai vīnu nu pravīšim.» Jezus jim saceja: «Bet par kū jyus mani uzskotot?» Seimaņs Pīters atbiļdēja jam, saceidams: «Tu esi Kristus, dzeivō Dīva Dāls.» Un Jezus atbyldūt saceja jam: «Svēteigs tu esi, Seimaņ, Jonas dāls, jo navys mīsa un asnis tev tū atklōja, bet muns Tāvs, kas ir dabasūs. Un es tev soku: Tu esi Pīters, un uz šōs kliņts es uzceļšu sovu Bazneicu. Un eļnes vōrti tū nauzvarēs. Es tev dūšu dabasu vaļsteibas atslāgas; un kū tu sasīsi vērs zemes, tys byus sasīts ari dabasūs, un kū tu atraiseisi vērs zemes, tys byus atraiseits ari dabasūs.» Tod jys sovim mōceklim pavēlēja, lai jī nivīnam nastōsteitu, ka jys ir Kristus.

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze