PYRMAIS LASEJUMS Dan 9, 4b–10
Atsazeišonōs grākūs.
LASEJUMS NU PRAVĪŠA DANIEĻA GRŌMOTAS
Kungs, lelais un brīsmeigais Dīvs, kas
sagloboj dereibu un žāļsirdeibu tim, kuri tevi mīļoj un īvāroj tovas
bausleibas! Mes grākōjom, nūsazīdzem, mes reikōjamēs bezdīveigi un sasacēlem,
un atsakōpem nu tovom bausleibom un tovim lykumim. Mes naklausejom tovim kolpim
pravīšim, kas tovā vōrdā runōja uz myusu kēnenim un myusu augstmanim, uz myusu
tāvim un uz vysim zemes ļaudim. Tev, Kungs, ir taisneiba, bet mums kauns uz
sejom, kai tys ir šudiņ Judas veirim un Jeruzalemes un vysa Izraeļa īdzeivōtōjim,
tim, kas ir tyvumā, un tim, kas ir tōli prūjom vysōs zemēs, uz kurom tu jūs
izdzini jūs nūzīgumu dēļ, kū jī dareja pret tevi. Kungs, kauns uz sejom mums,
myusu kēnenim, myusu augstmanim un myusu tāvim, jo mes grākōjom pret tevi! Bet
pi Kunga, myusu Dīva, ir žāļsirdeiba un pīdūšona, kaut gon mes pret jū sasacēlem
un naklausejom Kunga, myusu Dīva, bolsam, ka mes staigōtu pēc jō Lykuma, kū jys
mums deve caur sovim kolpim pravīšim.
Tys ir Dīva vōrds.
PSALME 79 (78)
Refrens: Dīvs,
nadori mums pēc myusu grākim. (R. sal. Ps 103,
10a)
8 Napīmiņ
myusu tāvu vaines;
tova žēlesteiba lai nōk ōtri pōr mums,
jo asam klivuši pōrlīku vōji.
9 Paleidzi,
mums, myusu pesteišonas Dīvs,
sova vōrda slaves dēļ myusus atbreivoj,
un sova vōrda dēļ pīdūd myusu grākus.
Refrens
11 Tovā
prīškā lai nūnōk gyustekņu vaimanas;
ar sovas rūkas spāku izglōb nūlamtūs nōvei.
13 Bet
mes, tova tauta un tovu ganeibu avis,
uz myužim gūdynōsim tevi,
nu paaudzes paaudzē teiksim tovu slavi.
Refrens
PYRMSEVANGELIJA DZĪDŌJUMSJņ
6, 64b. 69b
Lai ir slaveits Dīva vōrds.
Tovi vōrdi, Kungs, ir gors un dzeiveiba,
tev ir myužeigōs dzeives vōrdi.
Lai ir slaveits Dīva vōrds.
EVANGELIJS Lk 6, 36–38
Pīdūdit, un ari jums tiks pīdūts.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
LUKASS
Tymā laikā Jezus saceja sovim mōcekļim:
«Esit žāļsirdeigi, kai ari jyusu Tāvs ir
žāļsirdeigs. Natīsojit, un jyus natiksit tīsōti; napazudynojit, un jyus natiksit
pazudynōti. Pīdūdit, un ari jums tiks pīdūts. Dūdit, un jums tiks dūts: lobs, pīspaideits,
sakrateits un pōri plyustūšs mārs jums tiks sabārts jyusu klēpī. Jo ar taidu pošu
māru, ar kaidu jyus mēreisit, ari jums tiks atmēreits.»
Tys ir Kunga vōrds.