PYRMAIS LASEJUMS At 26, 16–19
Dīva tautas svātums.
LASEJUMS NU ATKŌRTŌTŌ LYKUMA GRŌMOTAS
Mozus uzrunōja tautu, saceidams:
«Šudiņ Kungs, tovs Dīvs, tev ir pavēlējis,
ka tu piļdeitu šōs bausleibas un lykumus un tūs īvārōtu un izpiļdeitu nu vysas
sovas sirds un vysas sovas dvēseles. Šudiņ tu esi izavēlējis Kungs, lai jys
byutu tev Dīvs un lai tu staigōtu jō ceļus un sorgōtu jō bausleibas, prīkšrokstus
un lykumus, un klauseitu jō pavēlem. Un Kungs šudiņ ir izavēlējis tevi, lai tu
byutu jam īpaša tauta, kai jys tev beja sacejis, un lai tu sorgōtu vysas jō bausleibas.
Un jys tevi paaugstynōs pōri vysom tautom, kuras ir radejis sovai slavei, vōrdam
un gūdam, lai tu byutu
svāta tauta Kungam, sovam Dīvam, kai jys
tū ir teicis.»
Tys ir Dīva vōrds.
PSALME 119 (118)
Refrens: Svēteigi
ir tī, kas klausa Dīvam. (R. sal. 1)
1 Svēteigi
tī, kas bez traipa staigoj sovu ceļu,
kas dzeivoj pēc Kunga bausleibom.
2 Svēteigi
tī, kas jō pamōceibas sorgoj,
nu vysas sirds jū meklej.
Refrens
4 Tu
esi pavēlējis styngri
sorgōt tovus lykumus.
5 Kaut
muni ceļi uz tū vīn vastu,
ka es īvārōtu tovus lykumus.
Refrens
7 Es
tev pasateikšu nu teiras sirds
par tū, ka īsamōceju tovas taisneibas
sprīdumus.
8 Tovus
aizrōdejumus es sorgōšu:
nikod naatstōj mani!
Refrens
PYRMSEVANGELIJA DZĪDŌJUMS 2 Kor 6, 2b
Lai ir slaveits Dīva vōrds.
Lyuk, tagad ir eistais laiks,
lyuk tagad ir pesteišonas dīna.
Lai ir slaveits Dīva vōrds.
EVANGELIJS Mt 5, 43–48
Esit piļneigi, kai jyusu dabasu Tāvs ir piļneigs.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Tymā laikā Jezus saceja sovim mōcekļim:
«Jyus asat dzērdējuši, ka ir saceits:
«Tev byus mīļōt sovu tyvōkū un īneist sovu īnaidnīku». Bet es jums soku: «Mīļojit
sovus īnaidnīkus un lyudzitēs par tim, kas jyusus vojoj un nīvoj, lai jyus
byutu jyusu Tāva bārni, kurs ir debesīs, jo jys līk sovai saulei uzlēkt pōr ļaunajim
un lobajim, un leitam leit pōr taisneigajim un nataisneigajim. Jo jyus mīļojat
tūs, kas jyusus mīļoj, kaida tod jums pīsanōk olga? Vai tod ari muitnīki tai
nadora? Un, jo jyus sveicynojat tikai sovus brōļus, kū sevišku jyus dorot? Vai tod
ari pogōni tai nadora? Tōpēc esit piļneigi, kai jyusu dabasu Tāvs ir piļneigs».
Tys ir Kunga vōrds.