Menu:














 


svātdĪna, 24. decembris

 

PYRMAIS LASEJUMS 2 Sam 7, 1 -5. 8b - 12. 14a. 16

Davida vaļsteiba myužam pastōvēs Kunga vaiga prīškā.

LASEJUMS NU SAMUEĻA ŪTRŌS GRŌMOTAS

Kod kēneņš Davids dzeivōja sovā nomā un Kungs jam vysapkōrt beja devis mīru nu vysim jō īnaidnīkim, kēneņš saceja pravīšam Natanam: «Vai redzi, ka es dzeivoju cīdru kūka nomā, bet Dīva skreine ir nūvītōta teļtī?» Natans saceja kēneņam: «Ej un dori vysu, kū tova sirds vēlejās, jo Kungs ir ar tevi.» Bet tamā pošā naktī Natanam atsaklōja Kunga vōrds: «Ej un pasoki munam kolpam Davidam: «Tai soka Kungs: Vai tod tu ceļsi maņ nomu, lai es tymā dzeivōtu? Nu laika, kur tu ganeji vuškas, es tevi pajēmu, lai tu vaļdeitu pōr munu Izraeļa tautu. Es asu ar tevi bejis vysur, kur vīn tu esi gōjis; es asu iznycynōjis tovā prīškā vysus tovus īnaidnīkus. Es devu tev lelu vōrdu blokus šōs zemes varonū vōrdam. Es pagōdōšu vītu munai Izraeļa tautai un ļaušu tai apsamest, un tei dzeivōs tī un natiks vairs vojōta. Un ļauni ļaudis tū vairs naapspīss kai seņōk un kūpš tōs dīnas, kod es īcēļu tīsnešus pōr sovu Izraeļa tautu. Un es tev dōvōšu mīru nu vysim īnaidnīkim. Un Kungs tev pasludynoj, ka jys pats tev uzceļs nomu. Kod byus pīpiļdeitas tovas dīnas un tu gulēsi pi sovim tāvim, es uzmūdynōšu pēc tevis tovu pēcnōcēju, kas nōks nu tovom mīsom, un nūstyprynōšu jō vaļsteibu. Es jam byušu par tāvu, un jys maņ byus par dālu. Tovs noms un tova vaļsteiba byus nasatrycynojams munā prīškā uz myužim, un tovs trūņs pastōvēs myužam.»

Tys ir Dīva vōrds.

 

PSALME 89 (88)

Refrens: Dīva žāļsirdeibu es slaveišu myužam. (R. sal. 2a)

2 Par Kunga žāļsirdeibu es dzīdōšu myužam,

ar sovu muti nu paaudzes paaudzē stōstēšu par tovu

uzticeibu.

3 Jo tu esi sacejis: «Žāļsirdeiba pastōvēs myužam»,

sovu uzticeibu tu esi nūstyprynōjis dabasūs.

Refrens

4 Ar sovu izvālātū es asu nūslēdzis dereibu,

es asu zvērējis Davidam, sovam kolpam:

5 Tovu dzymumu es nūstyprynōšu uz myužim,

un tovu sēdekli ceļšu uz paaudžu paaudzem.

Refrens

27 Jys mani pīsauks: «Tu esi muns Tāvs,

muns Dīvs un munas pesteišonas klints.»

29 Sovu žāļsirdeibu jam es globōšu uz myužim,

un muna dereiba ar jū byus drūša.

Refrens

 

ŪTRAIS LASEJUMS Rom 16, 25 - 27

Nūslāpums, kas nu myužeigim laikim nav bejis izpausts, tagad

ir dareits zynoms.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Brōli:

Tam, kas jyusus spēj styprynōt saskaņā ar munu Evangeliju un mōceibu par Jezu Kristu, saskaņā ar atklōtū nūslāpumu, kas senajim myužim natyka izpausts, bet tagad ir dareits zynoms un pēc myužeigō Dīva pavēles ar pravīšu rokstim ir pasludynōts vysom tautom, lai tōs pakļautu ticeibai, tam – vīneigajam vysugudrōkajam Dīvam, lai caur Jezu Kristu ir gūds myužu myužūs. Amen.

Tys ir Dīva vōrds.

 

PYRMSEVANGELIJA DZĪDŌJUMS Lk 1, 38

Alleluja.

Raug, es asu Kunga kolpyune,

lai maņ nūteik pēc tova vōrda.

Alleluja.

 

EVANGELIJS Lk 1, 26 - 38

Marija ījims un dzemdēs dālu.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Tymā laikā:

Dīvs syuteja eņgeli Gabrieli uz Galilejas piļsātu, kas saucēs Nazarete, pi Jaunovas, kas beja sadarynōta ar veiru vōrdā Jezupu, nu Davida ciļts, un Jaunovas vōrds beja Marija. Un eņgeļs īnōcis jai saceja: «Esi sveicynōta, žēlesteibas pylnō, Kungs ir ar tevi!» Jei sasatryuka par šim vōrdim un dūmōja pi sevis, kas tys varātu byut par sveicīni. Bet eņgeļs jai saceja: «Nasabeisti, Marija, jo tu esi atroduse žēlesteibu pi Dīva. Redzi, tu ījimsi un dzemdēsi Dālu, un jū nūsauksi vōrdā Jezus. Jys byus lels, un jū sauks par Vysuaugstōkō Dālu, un Kungs Dīvs jam dūs jō tāva Davida trūni. Un jys vaļdeis pōr Jākuba nomu myužeigi, un jō vaļsteibai nabyus gola.» Tod Marija saceja eņgeļam: «Kai tys nūtiks, jo es taču veira nepazeistu?» Eņgeļs jai atbiļdēja: «Svātais Gors nōks pōr tevi, un Vysuaugstōkō spāks tevi apānōs. Tōpēc Svātais, kas nu tevis dzims, tiks saukts par Dīva Dālu. Redzi, Elizabete, tova radineica, vēļ sovā vacumā ir ījāmuse dālu, un šys ir sastais mēness tai, kuru sauc par naaugleigu, jo Dīvam nikas nav naīspējams.» Tod Marija saceja: «Raug, es asu Kunga kolpyune, lai maņ nūteik pēc tova vōrda.» Un eņgeļs nu jōs aizgōja.

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze