Menu:














 


svātdĪna, 22. oktobris

PYRMAIS LASEJUMS Is 45. 1. 4-6

Kēneņš Kīrs – reiks Dīva rūkōs.

LASEJUMS NU PRAVĪŠA ISAJA GRŌMOTAS

Tai soka Kungs par sovu svaideitū Kīru:

«Es satvēru jō lobū rūku, lai jō prīškā pakļautu tautas un salīktu kēneņu skaustus, un atvārtu durovas jō prīškā un lai vōrti natyktu aizslāgti. Muna kolpa Jākuba dēļ un Izraeļa, muna izvālātō, dēļ es tevi nūsauču tovā vōrdā, tevi pagūdynōju, lai gon tu mani napazyni. Es asu Kungs, un cyta nav: ōrpus manis nav Dīva. Es tevi apjūžu, lai gon tu mani napazyni, lai nu saules lākta leidz rītam byutu zynoms, ka bez manis nav nikō. Es asu Kungs, un cyta nav.»

Tys ir Dīva vōrds.

 

PSALME 96 (95)

Refrens: Sludynojit tautom Dīva breineigūs dorbus. (R. sal. 3)

1 Dzīdit Kungam jaunu dzīsmi,

Dzīdit Kungam, vysa zeme!

3 Teicit jō gūdu pogōnu ļaudim,

vysom tautom – jō breineigūs dorbus.

Refrens

4 Tōdēļ ka lels ir Kungs un augsti teicams,

jō jōsabeist vairōk par vysim dīvim.

5 Tōdēļ ka vysi pogōnu dīvi ir mōni,

bet Kungs ir radejis dabasus.

Refrens

7 Dūdit Kungam jyus, vysas tautas,

dūdit Kungam gūdu un atzeistit varu,

8 dūdit Kungam jō vōrda gūdu.

Nesit upurus un eite jō pogolmūs.

Refrens

9 Pīlyudzit Kungu svātajā spūžumā.

Jō vaiga prīškā nūdrebit, vysa zeme,

10 sokit pogōnu ļaudim: «Kungs ir vaļdnīks!»

Jys tīsōs tautas pēc patīseibas.

Refrens

 

ŪTRAIS LASEJUMS 1 Tes 1, 1-5b

Pōvuls pasateic Dīvam par tesalonikīšu ticeibu, cereibu un mīlesteibu.

LASEJUMS NU SVĀTŌ APOSTOLA PŌVULA PYRMŌS VĒSTULES TESALONIKĪŠIM

Pōvuls, Silvans un Timotejs tesalonikīšu draudzei Dīvā Tāvā un Kungā Jezū Kristū. Žēlesteiba jums un mīrs! Mes vysod pasateicam Dīvam par jums vysim, pīmynādami jyusus sovōs lyugšonōs un pastōveigi atcarādamīs Dīva un myusu Tāva prīškā jyusu ticeibas dorbu, mīlesteibas pyules un iztureigū cereibu uz myusu Kungu Jezu Kristu. Mes zynam, Dīva mīļōtī brōli, par jyusu izraudzeišonu, jo myusu Evangelija sludynōšona jyusu vydā nūtyka na tikai vōrdūs, bet ari spākā un Svātajā Gorā, un lelōs pōrlīcynōšonas spējōs.

Tys ir Dīva vōrds.

 

PYRMSEVANGELIJA DZĪDŌJUMS Flp 2. 15-16

Alleluja.

Jyus speidit pasaulē kai zvaigznes,

turūtīs pi Dzeiveibas Vōrda.

Alleluja.

 

EVANGELIJS Mt 22, 15-21

Atdūdit keizaram tū, kas ir keizara, un Dīvam tū, kas ir Dīva.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Farizeji aizgōjuši nūturēja apsprīdi, lai Jezu pīkartu vōrdūs. Un jī syuteja jam sovus mōcekļus kūpā ar herodīšim, saceidami: «Mōceitōj, mes zynom, ka tu esi patīss un Dīva ceļu mōci patīseibā un ka tev naryup izpatikt nivīnam, jo tu nasaver uz cylvāka personu. Tōpēc soki mums, kai tev škīt, vai dreikst moksōt keizaram nūdūkli, vai nā?» Bet Jezus, sapratis jūs nakrītneibu, saceja: «Kōpēc jyus mani kārdynojat, līkuli? Parōdit maņ nūdūkļu monetu.» Un tī jam atnese denariju. Un jys tim saceja: «Kō ir šys attāls un uzroksts?» Tī jam atbiļdēja: «Keizara.» Tod jys tim teice: «Tōpēc atdūdit keizaram tū, kas ir keizara, un Dīvam tū, kas ir Dīva.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze