PYRMAIS LASEJUMS Est 14, 1. 3–5. 12–14 (VIg)
Esteres lyugšona brīsmu breidī.
LASEJUMS NU ESTERES GRŌMOTAS
Tamōs dīnōs:
Kēnenīne Estere grīzēs pi Kunga, nūsabeiduse
nu draudūšojam brīsmem. Un jei korsti lyudze Kungu, Izraeļa Dīvu, saceidama:
«Muns Kungs, kas esi myusu vīneigais Karalis, paleidzi maņ vīntulei, kurai nav
nivīna aizstōva, izjamūt tevi. Munas brīsmes asūt munōs rūkōs. Es dzērdēju nu
muna tāva, ka tu, Kungs, esi izraudzejis Izraeli nu vysom tautom un myusu tāvus
– nu vysim jūs senčim, lai sev īgyutu myužeigu montōjumu. Un tu izpiļdeji jim tū,
kai beji sacejis. Atcerīs, Kungs! Pasarōdi mums myusu cīsšonu breidī un dōvoj
maņ paļōveibu! Kungs, Vaļdnīk pōr dīvim un pōr ikvīnu varu! Īlic munā mutē
gudru volūdu lauvas prīškā un piļdi jō sirdi ar nyknumu pret myusu īnaidnīku,
lai tys aizīt būjā un ari tī, kuri tam pīkreit. Bet myusus izglōb ar sovu rūku
un paleidzi maņ, kurai
nav nikaida atbolsta, kai vīneigi tu,
Kungs, kas vysu zini.»
Tys ir Dīva vōrds.
PSALME 138 (137)
Refrens: Kungs,
uzklausi mani, kod tevi pīsaukšu. (R.
sal. 3a)
1 Kungs,
es teikšu tevi nu vysas sovas sirds,
jo tu uzklauseji munas mutes vōrdus.
Es dzīdōšu tev eņgeļu prīškā
2 un pīlyugšu
tevi tovā svātajā templī.
Refrens
Un es slavēšu tovu vōrdu
tovas žāļsirdeibas un uzticeibas dēļ.
3 Tamā
dīnā, kod pīsaukšu tevi, uzklausi mani,
vairoj munas dvēseles spākus.
Refrens
7 Mani
izglōbs tova lobō rūka.
8 Kungs
tū paveiks munā lobā.
Kungs, tova žāļsirdeiba pastōv myužam:
nanycynoj sovu rūku dorbu.
Refrens
PYRMSEVANGELIJA DZĪDŌJUMS Ps 51,12a.14a
Lai ir slaveits Dīva vōrds.
Dīvs, rodi manī skaidru sirdi
un dūd maņ otkon sovas pesteišonas prīcu.
Lai ir slaveits Dīva vōrds.
EVANGELIJS Mt 7, 7–12
Kas lyudz, tys sajam.
LASEJUMS NU JEZUS KRISTUS EVANGELIJA, KŪ UZRAKSTEIJIS SVĀTAIS
MATEJS
Tymā laikā Jezus saceja sovim mōcekļis:
«Lyudzit, un jums tiks dūts; meklejit,
un jyus atrassit; klauvejit, un jums tiks atvārts. Jo kotrs, kas lyudz, sajam; un
kas meklej, tys atrūn; un klauveitōjam teik atvārts. Vai tod storp jums ir cylvāks,
kurs sovam dālam dūtu akmini, kod jys lyugtu maizi? Vai ari pasnāgtu čyusku,
kod jys lyugtu zivi? Taitod, jo jyus, kaut ari asat ļauni, prūtat sovim bārnim
dūt lobas dōvonas, tod vēļ vairōk jyusu Tāvs, kas ir debesīs, dūs lobu tīm, kas
jū lyudz. Vysu, kū jyus vēlejatīs, lai cylvāki jums dareitu, dorit ari jyus
jim. Jo tys ir Lykums un pravīši.
Tys ir Kunga vōrds.