PYRMAIS LASEJUMS Jon 3, 1–10
Atsagrīzšona nu grākim izsauc Dīva žāļsirdeibu.
LASEJUMS NU PRAVĪŠA JONASA GRŌMOTAS
Jonasam atsaklōja Kunga vōrds,
saceidams: «Celīs un ej uz lelū piļsātu Ninivi un sludynoj tymā breidynōjumu,
kuru es tev pateikšu». Un Jonass pīsacēle un aizgōja uz Ninivi, kai Kungs beja sacejis.
Ninive Dīva prīškā beja ļūti plaša piļsāta – treju dīnu gōjumā. Un Jonass sōce īt
piļsātā vīnas dīnas gōjumu un sauce, un sludynōja: «Vēļ četrdesmit dīnas, un
Ninive tiks nūpūsteita». Un ninivīšu veiri īticēja Dīvam, pasludynōja gavēni un
nu lela leidz mozam īsagērbe maisūs. Un šei vēsts nūnōce leidz Ninives kēneņam.
Un jys pīsacēle nu sova trūņa, nūjēme nu sevis sovu apmetni un, īsagērbis maisā,
apsasāda palnūs. Un Ninivē ar ķēneņa un jō augstmaņu pavēli tyka saukts un izziņōts:
«Cylvāki un dzeivnīki, lūpi un gonompulki lai nikō naād, naīt ganeibōs un
nadzer yudiņa, un ļaudis un dzeivnīki lai apsasadz ar maisim un dedzeigi sauc
uz Dīvu. Un lai nūsagrīž veirs nu sova ļaunō ceļa un nu varmūceibas, kū ir
darejis ar sovom rūkom. Kas zyna, varbyut Dīvs pīsavērss un pīdūs, un atsakōps
nu sovu dusmu bardzeibas, un mes naaizīsim būjā?» Un Dīvs redzēja jūs dorbus,
ka jī ir atsakōpuši nu sova ļaunō ceļa. Un Dīvam kļiva žāl tō pūsta, kuru jys
beja apsajēmis tim uzsyuteit, un jys tō nauzsyuteja.
Tys ir Dīva vōrds.
PSALME 51 (50)
Refrens: Dīvs,
tu nanycynōsi satrīktu sirdi. (R. sal. 19b)
3 Dīvs,
apsažāloj par mani
sovā lelajā žāļsirdeibā
un sovas labvēleibas piļneibā
izdzēs munu nataisneibu.
4 Mozgoj
mani teiru nu nūzīdzeibas traipa
un nu grāka mani škeistej.
Refrens
12 Dīvs,
rodi manī skaidru sirdi
un atjaunoj manī styngru goru.
13 Naatmet
mani nu sova vaiga,
un sovu svātū goru naatjem nu manis.
Refrens
18 Jo
upura dōvona tev nadora prīcu,
dadzynojamais upurs, jo ari es tū dūtu,
tev napatiks.
19 Satrīkts
gors ir eistais upurs Dīvam,
satrīktu un pazamōtu sirdi, Dīvs, tu
nanycynōsi.
Refrens
PYRMSEVANGELIJA DZĪDŌJUMS Jl 2, 13
Lai ir slaveits Dīva vōrds.
Atsagrīzit pi Kunga, sova Dīva,
jo jys ir laipns un žēleigs.
Lai ir slaveits Dīva vōrds.
EVANGELIJS Lk 11, 29–32
Pravīša Jonasa zeime: nōve un augšanceļšonōs.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
LUKASS
Tymā laikā:
Ļaudim puļcejūtīs kūpā, Jezus sōce runōt:
«Šei ciļts ir samaitōta ciļts. Tei prosa zeimi, bet cyta zeime tai natiks dūta,
kai tikai Jonasa zeime. Jo taipat kai Jonass beja zeime ninivīšim, tai Cylvāka
Dāls byus šai ciļtei. Dīnvydu kēnenīne pīsaceļs tīsā pret šōs ciļts veirim un jūs
nūtīsōs, tōdēļ ka jei gōja nu pasaules molas klauseitīs Salomona gudreibu, bet šeit,
lyuk, ir vairōk kai Salomons. Ninives veiri pīsaceļs tīsā pret šū ciļti un tū nūtīsōs,
jō jī, Jonasam sludynojūt, atsagrīze nu grākim, bet šeit, lyuk, ir vairōk kai
Jonass.»
Tys ir Kunga vōrds.