Menu:














 

trešdīna, 1. novembris

VYSI SVĀTĪ

Obligatōs svineibas

PYRMAIS LASEJUMS Atkl 7, 2-4. 9-14

Atpesteitū lelais pulks.

LASEJUMS NU SVĀTŌ APOSTOLA JŌŅA ATKLŌSMES GRŌMOTAS

Es, Jōņs, īraudzeju cytu eņgeli, kōpam augšup nu saules lākta. Jam beja dzeivō Dīva zeimūgs, un jys sauce skaļā bolsā četrim eņgelim, kurim beja dūts kaitēt zemei un jyurai, saceidams: «Nakaitejit ni zemei, ni jyurai, ni kūkim, koleidz mes nabyusim apzeimūgōjuši myusu Dīva kolpus uz jūs pīrem.» Un es dzērdēju apzeimūgōtū skaitu: symts četrudesmit četri tyukstūši apzeimūgōtū nu vysom Izraeļa dālu ciļtim. Pēc tam es redzēju lelu ļaužu pulku, kō nivīns navarēja saskaiteit, nu vysom dzymtom, ciļtim, tautom un volūdom. Jī stōvēja trūņa un Jāra prīškā, tārpušīs boltōs drēbēs, ar palmu zorim rūkōs un sauce skaļā bolsā saceidami: «Pesteišona myusu Dīvam, kas sēd trūnī, un Jāram.» Un vysi eņgeli stōvēja apkōrt trūņam un Seņtāvim, un četrom Byutnem, un kryta uz sova vaiga trūņa prīškā un pīlyudze Dīvu, saceidami: «Amen! Slave un gūds, un gudreiba, un pateiceiba, un cīns, un spāks, un vareneiba myusu Dīvam myužu myužūs. Amen.» Un vīns nu Seņtāvim atbyldūt maņ saceja: «Šytī boltajōs drēbēs ītārptī, kas jī ir un nu kurīnes jī nōkuši?» Un es jam atbiļdēju: «Muns Kungs, tu taču zini». Un jys maņ saceja: «Šytī ir tī, kas nōkuši nu lelom cīsšonom un sovas drēbes mozgōjuši, un tōs balynōjuši Jāra asnī.»

Tys ir Dīva vōrds.

 

PSALME 24 (23)

Refrens: Šei ir paaudze, kas meklej Dīvu. (R. sal. 6)

1 Kungam pīdar zeme un vyss, kas zemes vērsā,

pasaule un vyss, kas tur dzeivoj.

2 Jo vērs jyurom jys tū ir uzcēlis,

jys tū ir nūlicis gar upu krostim.

Refrens

3 Kas uzkōps Kunga kolnā

un kas stōvēs jō svātajā vītā?

4 Tys, kam skaidra sirds un teiras rūkas,

kas pi tukšeibom sovu dvēseli nasaista

un nadūd nataisnu zvārastu.

Refrens

5 Nu Kunga jys sajims svēteibu

un atleidzeibu nu Dīva, sova Pesteitōja.

6 Šei ir paaudze, kas jū meklej,

kas meklej Jākuba Dīva vaigu.

Refrens

 

ŪTRAIS LASEJUMS 1 Jņ 3, 1-3

Mes redzēsim Dīvu taidu, kaids jys ir.

LASEJUMS NU SVĀTŌ APOSTOLA JŌŅA PYRMŌS VĒSTULES

Muni meilī:

Redzit, kaidu mīlesteibu Tāvs mums ir dōvōjis, ka mes teikam saukti par Dīva bārnim, un taidi mes asam! Pasauļs myusu napazeist, tōdēļ ka tys napazyna jō. Muni mīļōtī, tagad mes asam Dīva bārni, un vēļ nav atklōts, kas byusim. Mes tūmār zynom, ka tod, kod jys pasarōdeis, mes byusim jam leidzeigi, jo redzēsim jū taidu, kaids jys ir. Un kotrs, kam ir šei cereiba uz jū, dora sevi svātu, kai jys ir svāts.

Tys ir Dīva vōrds.

 

PYRMSEVANGELIJA DZĪDŌJUMS Mt 11, 28

Alleluja.

Nōcit pi manis vysi, kas strōdojat un cīšat gryuteibas,

un es jyusus atspērdzynōšu.

Alleluja.

 

EVANGELIJS Mt 5, 1-12a

Ostoņas svēteibas.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā:

Radzādams ļaužu pulkus, Jezus uzkōpe kolnā. Kod jys beja apsasēdis, pi jō pīgōja mōcekli, un jys sōce tūs mōceit, saceidams: «Svēteigi tī, kas nakōroj pēc montas, jo jim pīdar dabasu vaļsteiba. Svēteigi lānprōteigī, jo jī īmontōs zemi. Svēteigi nūskumušī, jo jī tiks īprīcynōti. Svēteigi tī, kas olkst un slōpst pēc taisneibas, jo jī tū sajims. Svēteigi žālsirdeigī, jo jī tiks apžālōti. Svēteigi tī, kam skaidra sirds, jo jī Dīvu redzēs. Svēteigi mīra nesēji, jo jūs sauks par Dīva bārnim. Svēteigi tī, kas teik vojōti taisneibas dēļ, jo jim pīdar dabasu vaļsteiba. Svēteigi jyus asat, jo manis dēļ jyusus nīvōs un vojōs, un apmalōs, runojūt par jums vysu ļaunu. Prīcojitēs un līksmojit, jo olga jums debesīs ir lela.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze