Menu:














 

pyrmūdīna, 1. JANVARS

VYSUSVĀTŌKŌ JAUNOVA MARIJA, DĪVA MŌTE

Obligatōs svineibas

PYRMAIS LASEJUMS Sk 6, 22 - 27

Dīva svēteiba.

LASEJUMS NU SKAITĻU GRŌMOTAS

Kungs runōja uz Mozu, saceidams: «Soki Aronam un jō dālim: Jums byus svēteit Izraeļa bārnus un jim saceit: «Kungs lai tevi svētej un lai tevi sorgoj! Kungs lai apgaismoj sovu vaigu pōr tevi un lai ir tev žēleigs. Kungs lai pagrīž sovu vaigu uz tevi un lai dūd tev mīru.» Tai jī pīsauks munu vōrdu pōr Izraeļa bārnim, un es jūs svēteišu.»

Tys ir Dīva vōrds.

 

PSALME 67 (66)

Refrens: Dīvs lai svētej vysas tautas. (R. sal. 2a)

2 Dīvs lai apsažāloj par mums un myusus svētej,

jō vaigs pōr mums lai gaiši atmirdz.

3 Tovs ceļš lai tūp zynoms zemes vērsā,

tova pesteišona — vysom tautom.

Refrens

5 Lai prīcojās un gavilej tautas,

jo ļaudim tu sprīd tīsu taisneigi

un vodi tautas zemes vērsā.

Refrens

6 Dīvs, lai tevi slavej tautas,

lai tevi slavej vysas tautas.

8 Lai Dīvs myusus svētej

un vysōs zemes molōs lai jō beistās.

Refrens

 

ŪTRAIS LASEJUMS Gal 4, 4 - 7

Dīvs syuteja sovu Dālu, dzymušu nu sīvītes.

LASEJUMS NU SVĀTŌ APOSTOLA PŌVULA VĒSTULES GALATĪŠIM

Brōli:

Kod pīsapiļdeja laiks, Dīvs syuteja sovu Dālu, dzymušu nu sīvītes un pakļautu lykumam, lai izpērktu tūs, kas beja zam lykuma varas, un lai mes īgyutu dālu tīseibas. Tai kai jyus asat dāli, Dīvs syuteja sova Dāla Goru jyusu sirdīs, kas soka: «Abba, Tāvs!» Taitod tu vairs naesi kolps, bet dāls, bet jo dāls, tod caur Dīvu ari maņtinīks.

Tys ir Dīva vōrds.

 

PYRMSEVANGELIJA DZĪDŌJUMS Ebr 1, 1 - 2

Alleluja.

Dīvs ir daudzkōrt runōjis uz myusu tāvim caur pravīšim;

beidzūt šamōs dīnōs jys ir runōjis uz mums caur Dālu.

Alleluja.

 

EVANGELIJS Lk 2, 16 - 21

Jū nūsauce vōrdā Jezus.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS LUKASS

Tymā laikā:

Goni steigšus gōja uz Betlemi un atroda Mariju, Jezupu un silē paguļdeitu bērneņu. Jū īraudzejuši, jī pastōsteja tū, kas par šū bārnu jim beja saceits. Un vysi, kas dzērdēja, breinējos par tū, kū goni jim stōsteja. Bet Marija paturēja prōtā vysus šūs vōrdus, pōrdūmōdama tūs sovā sirdī. Un goni atsagrīze atpakaļ, gūdynōdami un teikdami Dīvu par vysu, kū beja redzējuši un dzērdējuši, kai tys jim beja sludynōts. Un, kod ostoņas dīnas beja pagōjušas un bārns beja jōapgraiza, jū nūsauce vōrdā Jezus, kai tū eņgeļs beja sacejis vēļ pyrms jō ījimšonas mōtes mīsā.

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze