pyrmūdīna, 19. marts
SVĀTAIS
JEZUPS – VYSSVĀTŌKŌS JAUNOVAS MARIJAS LEIGAVAIŅS
Obligatōs svineibas
PYRMAIS LASEJUMS 2 Sam 7, 4-5a. 12-14a. 16
Mesija byus Davida pēcnōcējs.
LASEJUMS NU SAMUEĻA ŪTRŌS GRŌMOTAS
Tamōs dīnōs:
Pravīšam Natanam atsaklōja Kunga vōrds:
«Ej un pasoki munam kolpam Davidam: «Tai soka Kungs: Kod byus pīpiļdeitas tovas
dīnas, un tu dusēsi blokus sovim tāvim, es uzmūdynōšu pēc tevis tovu pēcnōcēju,
kas nōks nu tovas mīsas, un nūstyprynōšu jō vaļsteibu. Jys uzceļs nomu munam vōrdam,
un es nūstyprynōšu jō vaļsteibas trūni uz myužim. Es byušu jam par tāvu, un jys
byus maņ par dālu. Un tovs noms un tova vaļsteiba byus nasatrycynojamas munā prīškā
uz myužim, un tovs trūņs pastōvēs myužam.»
Tys ir Dīva vōrds.
PSALME 89 (88)
Refrens: Jō
dzymums pastōvēs myužam. (R. sal. 37a)
2 Par
Kunga žāļsirdeibu es dzīdōšu myužam,
ar sovu muti nu paaudzes paaudzē stōsteišu
par tovu uzticeibu.
3 Jo tu
esi sacejis: «Žāļsirdeiba pastōv myužam,»
sovu uzticeibu tu esi nūstyprynōjis
dabasūs.
Refrens
4 Ar
sovu izvālātū es asu nūslēdzis dereibu,
es asu zvērējis Davidam, sovam kolpam:
5 Uz
myužim es nūstyprynōšu tovu dzymumu
un tovu sēdekli ceļšu uz paaudžu
paaudzem.»
Refrens
27 Jys
mani pīsauks: «Tu esi muns Tāvs,
muns Dīvs un munas pesteišonas kliņts.»
29 Sovu žēlesteibu
es globōšu jam uz myužim,
un muna dereiba ar jū byus drūša.
Refrens
ŪTRAIS LASEJUMS Rom 4, 13. 16-18. 22
Jys preteji cereibai ticēja.
LASEJUMS NU SVĀTŌ APOSTOLA PŌVULA VĒSTULES ROMĪŠIM
Brōli:
Abrahamam un jō pēcnōcējim dūtais apsūlejums,
ka jys kļyus pasaules montōtōjs, tyka padareits atkareigs navys nu Lykuma piļdeišonas,
bet gon nu attaisnōšonas ticeibas dēļ. Tōpēc tys izrīt nu ticeibas, lai tys baļsteitūs
uz žēlesteibu un lai apsūlejums byutu nūdrūšynōts vysim pēcnōcējim: na tikai
tim, kas ir nu Lykuma, bet ari tim, kam ir Abrahama ticeiba. – Jys ir vysu
myusu tāvs, kai ir raksteits: «Es tevi īcēļu par tāvu daudzom tautom» – Dīva prīškā,
kuram jys īticēja, ka tys atdzeivynoj myrušūs un izsauc asameibā tū, kō nav. Un
jys preteji cereibai īticēja cereibai, ka jys kļyus daudzu tautu tāvs saskaņā
ar tū, kas beja saceits: «Taidi byus tovi pēcnōcēji.» Tōpēc tys jam tyka īskaiteits
kai taisneigums.
Tys ir Dīva vōrds.
PYRMSEVANGELIJA DZĪDŌJUMS Ps 84, 5
Lai ir slaveits Dīva vōrds.
Kungs, svēteigi ir tī, kas dzeivoj tovā
nomā:
jī myužam tevi slaveis.
Lai ir slaveits Dīva vōrds.
EVANGELIJS Mt 1, 16. 18-21. 24a
Jezupam kļyust zynoms cylvāktopšonas nūslāpums.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
MATEJS
Jākubam dzyma Jezups, Marijas veirs, nu
kuras pīdzyma Jezus, kas teik saukts Kristus. Ar Jezus Kristus dzimšonu beja
tai: Kod jō Mōte Marija beja sadarynōta ar Jezupu, pyrmōk nakai jī sagōja kūpā,
izarōdeja, ka jei ir mōtes cereibōs nu Svātō Gora. Jezups, jōs veirs, byudams
taisneigs un nagrybādams jai ceļt naslavi, gribēja jū klusom atstōt. Bet, cikom
jys par tū dūmōja, lyuk, Kunga eņgeļs pasarōdeja jam sapynā, saceidams: «Jezup,
Davida dāls, nasabeist pījemt sovu sīvu Mariju, jo, kas jymā dzimis, tys ir nu
Svātō Gora. Un jei dzemdēs Dālu, un tu nūsauksi jū vōrdā Jezus, tōdēļ ka jys
atpesteis sovu tautu nu jōs grākim.» Pasamūdīs nu mīga, Jezups izdareja tai,
kai Kunga eņgeļs beja jam pavēlējis.
Tys ir Kunga vōrds.
Voi ari:
EVANGELIJS Lk 2, 41-51a
Marija un Jezups atrūn Jezu svētneicā.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
LUKASS
Jezus vacōki kotru godu Pashas svātkūs gōja
uz Jeruzalemi. Un, kod jam palyka divpadsmit godu, jī pēc svātku īroduma devēs
uz turīni. Svātkim beidzūtīs, jī gōja atpakaļ, bet zāns Jezus palyka Jeruzalemē,
un vacōki tū nazynōja. Dūmōdami, ka jys ir storp ceļa bīdrim, jī nūgōja dīnas gōjumu
un meklēja jū pi rodim un paziņom. Jū naatroduši, jī grīzēs atpakaļ un meklēja
jū Jeruzalemē. Pēc trejom dīnom jī atroda jū svētneicā sēžūt storp mōceitōjim,
tūs klausūtīs un jautojūt. Un vysi, kas jū dzērdēja, beja pōrsteigti par jō
gudreibu un atbiļdem. Jū īraudzējuši, vacōki breinōjōs, bet jō Mōte jam saceja:
«Dāls, kōpēc tu mums tai izdareji? Redzi, tovs tāvs un es ar sōpem tevi meklējom.»
Bet jys atbiļdēja jim: «Kōpēc jyus mani meklējot? Vai jyus nazynōjot, ka maņ
vajag byut pi tō, kas atsateic uz munu Tāvu?» Bet jī naizprota vōrdus, kū jys
tim saceja. Tod jys aizgōja jim leidza un nūnōce Nazaretē, un beja jim
paklauseigs.
Tys ir Kunga vōrds.