Menu:














 


svātdĪna, 18. februars

PYRMAIS LASEJUMS Rad 9, 8–15

Dīvs pēc plyudim nūslādz dereibu ar Noasu.

LASEJUMS NU RADEIŠONAS GRŌMOTAS

Dīvs saceja Noasam un jō dālim šaidus vōrdus:

«Lyuk, es nūslādzu dereibu ar jums un ar jyusu dzymumu pēc jums, un ar ikvīnu dzeivu byutni, kas ir ar jyusim: ar putnim, mōjis lūpim un meža zvērim, kuri ir pi jyusim; ar vysim, kas ir izgōjuši nu škērsta, ar vysim zemes zvērim. Es nūslādzu ar jums dereibu, ka nikod vairs natiks iznycynōta nivīna mīsa yudiņa plyudūs, ni ari turpmōk byus plyudi, kas izpūsteitu zemi.» Un Dīvs saceja: «Un tei byus dereibas zeime, kū es nūslādzu uz myužeigim laikim storp sevi un jums un ikvīnu dzeivu byutni, kas ir ar jums. Es nūlīku mōkūņūs varaveiksni, un tei byus zeime dereibai storp mani un zemi. Un, kod es ar mōkūnim aizsegšu debesis, mōkūņūs pasarōdeis muna varaveiksne, un es atcerēšūs munu dereibu ar jums un ar ikvīnu dzeivu byutni, kam ir mīsa. Un vairs nabyus yudiņa plyudu, kas iznycynōtu vysu dzeivū.»

Tys ir Dīva vōrds.

 

PSALME 25 (24)

Refrens: Kunga ceļi ir patīsi un drūši. (R. sal. 10)

4 Kungs, dori maņ zynomus sovus ceļus

un mōci mani staigōt tovas stygas.

5 Sovā patīseibā mani vodi un mōci,

jo tu esi Dīvs, muns glōbējs.

Refrens

6 Pīmiņ, Kungs, sovus žāļsirdeibas dorbus

un sovu labvēleibu, kas pastōv nu myužim.

7 Sovā žāļsirdeibā, Kungs, atcerīs mani,

pīmiņ sovā labvēleibā.

Refrens

8 Kungs ir lobs un taisneigs,

tōpēc grēcinīkim jys parōdeis ceļu.

9 Lānprōteigūs jys vadeis taisneibā,

pazemeigūs mōceis staigōt jō ceļus.

Refrens

 

ŪTRAIS LASEJUMS 1 Pīt 3, 18–22

Kristeibas yudiņs mums nas pesteišonu.

LASEJUMS NU SVĀTŌ APOSTOLA PĪTERA PYRMŌS VĒSTULES

Kristus vīnreiz ir nūmiris myusu grāku dēļ, taisneigais par nataisneigajim, lai jyusus pīvastu pi Dīva. Jys gon tyka nūnōvāts mīsā, tūmār dzeivs dareits Gorā. Tymā jys pat gōja un sludynōja pesteišonu tim gorim, kas beja cītumā, kas kaidreiz beja napakļōveigi, kod Dīva pacīteiba Noasa dīnōs gaideja un kod tyka byuvāts škērsts, kurā nadaudzi, tys ir, ostoņas dvēseles tyka izglōbtas caur yudini. Tys attāloj kristeibu, kas ari jyusus tagad izglōb un ir navys mīsas nateireibu nūmozgōšona, bet gon Dīvam vārsts lyugums pēc lobas sirdsapziņas, bolstūtīs uz Jezus Kristus augšanceļšonūs. Jys ir pi Dīva lobōs rūkas, uzkōpis debesīs, kur jam ir pakļauti eņgeli, varas un spāki.

Tys ir Dīva vōrds.

 

PYRMSEVANGELIJA DZĪDŌJUMS Mt 4, 4b

Lai ir slaveits Dīva vōrds.

Na nu maizes vīn cylvāks dzeivoj,

bet nu ikvīna vōrda, kas izīt nu Dīva mutes.

Lai ir slaveits Dīva vōrds.

 

EVANGELIJS Mk 1, 12–15

Jezus teik valna kārdynōts, un jam kolpoj eņgeli.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MARKS

Tymā laikā:

Gors aizvede Jezu tuksnesī. Un jys uzaturēja tuksnesī četrudesmit dīnas un tyka satana kārdynōts. Jys dzeivōja kūpā ar zvērim, un eņgeli jam kolpōja. Pēc Jōņa apcītynōšonas Jezus aizgōja uz Galileju un sludynōja Evangeliju par Dīva vaļsteibu, saceidams: «Laiks ir pīsapiļdejis un Dīva vaļsteiba ir tyvu. Nūžālojit grākus un ticit Evangelijam.»

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze