Menu:














 


svātdĪna, 17. decembris

PYRMAIS LASEJUMS Is 61, 1 - 2a. 10 - 11

Es prīcōšūs Kungā.

LASEJUMS NU PRAVĪŠA ISAJA GRŌMOTAS

Kunga Dīvs Gors ir pōr mani, jo Kungs ir mani svaidejis. Jys ir mani syutejis sludynōt prīcas vēsti lānprōteigajim, dzīdynōt satrīktōs sirdis, sludynōt atlaisšonu gyusteknim un breiveibu cītumnīkim – pasludynōt Kunga žēlesteibas godu. Es prīcōdamīs prīcōšūs Kungā, un muna dvēsele gavilēs munā Dīvā, jo jys mani ir īgērbis atpesteišonas drēbēs, ar taisneibas svōrkim jys mani ir apsedzis kai leigovaini, kam uzlykts vainags, kai leigovu, kas greznōta ar rūtom. Jo, kai zeme dūd sovus augļus un dōrzā uzdeigst sākla, tai Kungs Dīvs liks uzplaukt taisneibai un slavei vysu tautu prīškā.

Tys ir Dīva vōrds.

 

DZĪDŌJUMS Lk 1

Refrens: Muna dvēsele gavilej Dīvā. (R. Is 61, 10b)

46 Augsti slavej Kungu, muna dvēsele,

47 un muns gors prīcojās Dīvā, munā Pesteitōjā,

48 jo jys ir uzlyukōjis sovas kolpyunes zemeibu.

Raug, nu šō laika mani svēteigu teiks vysas paaudzes.

Refrens

49 Jo lelas lītas maņ ir darejis Varonais,

un svāts ir jō vōrds,

50 un jō žālsirdeiba palīk uz paaudžu paaudzem

tim, kas jō beistās.

Refrens

53 Olkonūs jys pīpylda ar lobumim,

bet bogōtūs atstōj tukšā.

54 Jys pījēme sovu kolpu Izraeli,

pīmynādams sovu žālsirdeibu.

Refrens

 

ŪTRAIS LASEJUMS 1 Tes 5, 16 - 24

Gatavojit dvēseli un mīsu Kunga atnōkšonai.

LASEJUMS NU SVĀTŌ APOSTOLA PŌVULA PYRMŌS VĒSTULES TESALONIKĪŠIM

Brōli:

Vysod esit prīceigi. Namiteigi lyudzitēs. Par vysu esit pateiceigi, jo taida ir Dīva gryba Kristū Jezū atteiceibā uz jums. Nanūslōpejit goru, nanycynojit pravītōjumus, bet pōrbaudit vysu. Kas lobs, tū paturit. Nu vysa ļaunō turitēs tōli. Un pats mīra Dīvs lai jyusus svētej vysā piļneibā, tai ka jyusu gors, dvēsele un mīsa tyktu saglobōta bez vaines myusu Kunga Jezus Kristus atnōkšonai. Tys, kas jyusus aicynoj, ir uzticeigs, un tū jys izdareis.

Tys ir Dīva vōrds.

 

PYRMSEVANGELIJA DZĪDŌJUMS Is 61, 1

Alleluja.

Kunga Gors ir pōr mani;

jys mani ir syutejis sludynōt nabogim prīcas vēsti.

Alleluja.

 

EVANGELIJS Jņ 1, 6 - 8. 19 - 28

Jōņs Kristeitōjs gatavoj Kristus atnōkšonu.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS JŌŅS

Beja Dīva syuteits cylvāks, jō vōrds beja – Jōņs. Jys nōce līceibas dēļ, lai dūtu līceibu par Gaismu un lai caur jū vysi ītycātu. Jys nabeja gaisma, bet nōce, lai līcynōtu par Gaismu. Un šei ir Jōņa līceiba, kod jūdi nu Jeruzalemes syuteja pi jō prīsterus un levitus, lai jam jautōtu: «Kas tu esi?», jys atsazyna, nasalīdze un aplīcynōja: «Es naasu Kristus.» Tod tī jam jautōja: «Kas tod? Vai tu esi Elijs?» Jys saceja: «Naasu.» «Vai tu esi pravīts?» Jys atbiļdēja: «Nā.» Tod tī jam saceja: «Kas tu esi? Mums taču jodūd atbiļde tim, kas myusus ir syutejuši. Kū tu pats soki par sevi?» Jys saceja: «Es asu saucēja bolss tuksnesī: Dorit taisnu Kungam ceļu, – kai pravīts Isajs ir sacejis.» Atsyuteitī beja farizeji. Un tī jam jautōja, saceidami: «Kōpēc tod tu kristej, jo naesi ni Mesija, ni pravīts?» Jōņs jim atbiļdēja: «Es krystu ar yudini, bet jyusu vydā ir tys, kuru jyus napazeistat un kurs pēc manis nōks. Jam es naasu cīneigs atraiseit kūrpu syksnas.» Tys nūtyka Betanijā, viņpus Jordanas, kur Jōņs kristeja.

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze