Menu:














 


pīktdĪna, 16. februars

PYRMAIS LASEJUMS Is 58, 1–9a

Gavēņs jōsaista ar tyvōkmīlesteibas dorbim.

LASEJUMS NU PRAVĪŠA ISAJA GRŌMOTAS

Tai soka Kungs:

«Skali sauc un nasarimsti! Kai taure paceļ sovu bolsu un munai tautai dori zynomus jōs nūzīgumus, Jākuba nomam – jūs grākus. Jī gon meklej mani ik dīnas un grib īpazeit munus ceļus, it kai tauta, kas asūt darejuse taisneibu un sova Dīva Lykumu naasūt atstōjuse. Jī prosa nu manis taisneigu tīsu, grib tyvōtīs Dīvam: «Kōpēc mes gavējom, bet tu nasaskateji, mērdējom sevi, bet tu naīvārōji?» Lyuk, sova gavēņa dīnā jyus aizajamat ar darejumim un apspīžat vysus jyusu strōdnīkus. Lyuk, jyus gavejat streidūs un kildōs un nakautreigi sytat ar dyuri. Nagavejit tai kai šamā dīnā, lai jyusu trūksnis byutu dzērdams augstumūs. Vai tod taids ir gavēņs, kū es vālūs, dīna, kurā cylvāks mērdej sevi? Vai tod kai nīdri nūkōrt sovu golvu, maisu un palnus lītōt kai guļvītu, vai tod tu tū sauksi pa gavēni un Kungam pateikamu dīnu? Vai tod dreižōk šys nav tys gavēņs, kū vālūs: saraut ļaunuma važas, izraiseit nabreives volgus, atlaist apspīstūs breivus, salauzt ikkotru jyugu; vai tad na sovu maizi daleit ar izsolkušū, īvest mōjā tryuceigūs un kleistūšūs? Jo redzi kaidu kailu, apgērb jū un nanūnīvoj sovu tyvōkū. Tod kai reita blōzma uzauss tova gaisma, un tova veseleiba atplauks jō dreiži. Tova taisneiba īs tev pa prīšku, un tevi pavadeis kunga gūdeiba. Tod tu sauksi, un Kungs uzklauseis, tu klīgsi, un jys atbiļdēs: «Lyuk, es asu te!»»

Tys ir Dīva vōrds.

 

PSALME 51 (50)

Refrens: Dīvs, tu nanycynōsi satrīktu sirdi. (R. sal. 19b)

3 Dīvs, apsažāloj par mani

sovā lelajā žāļsirdeibā

un sovas labvēleibas piļneibā

izdzēs munu nataisneibu.

4 Mozgoj mani teiru nu nūzīdzeibas traipa

un nu grāka mani škeistej.

Refrens

5 Jo es atzeistu sovu vaini,

un muns grāks arvīn ir munā prīškā.

6 Pret tevi vīn asu grākōjis un ļaunu darejis tovā

prīškā,

bet tovs sprīdums ir pareizs, un tovs lāmums ir

taisneigs.

Refrens

18 Jo upura dōvona tev nadora prīcu,

dadzynojamais upurs, jo ari es tū dūtu, tev napatiks.

19 Satrīkts gors ir eistais upurs Dīvam,

satrīktu un pazamōtu sirdi Dīvs tu nanycynōsi.

Refrens

 

PYRMSEVANGELIJA DZĪDŌJUMS Am 5, 14

Lai ir slaveits Dīva vōrds.

Meklejit lobu, navys ļaunu, lai jyus dzeivōtu,

un Kungs Dīvs byus ar jums.

Lai ir slaveits Dīva vōrds.

 

EVANGELIJS Mt 9, 14–15

Kod nu jim leigovaiņs tyks pajimts, tod jī gavēs.

LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS MATEJS

Tymā laikā, kod Jezus beja pōrsacēļs atpakaļ pōr azaru nu Gadarenīšu zemes, pi jō pīgōja Jōņa mōcekļi un jautōja: «Kōpēc mes un farizeji bīži gavejam, bet tovi mōcekļi nagavej?» Un Jezus jim saceja: «Vai kōzu vīsi var byut nūskumuši, koleidz leigavaiņs ir pi jim? Bet nōks dīnas, kod nu jim leigavaiņs tiks pajimts. Un tod jī gavēs.»

Tys ir Kunga vōrds.



























Copyright © 2013-2018 Romas katoļu Baznīcas Rēzeknes-Aglonas diecēze