PYRMAIS LASEJUMS At 30, 15–20
Uzticeiba un grāks, dzeiveiba un nōve.
LASEJUMS NU ATKŌRTŌTŌ LYKUMA GRŌMOTAS
Mozus uzrunōja tautu, saceidams:
«Redzi, šudiņ es nūlīku tovā prīškā
dzeiveibu un laimi, vai ari preteji – nōvi un nalaimi. Jo tu klauseisi Kunga,
sova Dīva, bausleibom, kuras es tev šudiņ dūdu, lai tu mīļōtu Kungu, sovu Dīvu,
un staigōtu jō ceļus, un piļdeitu jō pavēles, bausleibas un lykumus, tod tu
dzeivōsi. Un jys tevi vairōs un tevi svēteis tamā zemē, kuru tu dūdīs īgyut. Bet,
jo tova sirds nūsavērss, un tu nagribēsi paklauseit un, moldu pīvylts, pīlyugsi
svešus dīvus un tim kolpōsi, es tev šudiņ pasludynoju, ka tu īsi būjā un nailgi
uzaturēsi zemē, kuru tu dūdīs īgyut, pōrgōjis Jordanu. Šudiņ pret jums es pīsaucu
debesis un zemi par līcinīkim, ka asu nūlicis jums prīškā dzeivi un nōvi, svēteibu
un lōstu. Izavēlej tod dzeivi, lai dzeivōtu gon tu, gon tovi pēcnōcēji, un mīļōtu
Kungu, sovu Dīvu, klauseitu jō bolsam un pi jō turātūs, – jys taču ir tova
dzeive un ilgs myužs, – un lai tu dzeivōtu zemē, par kuru Kungs beja zvērējis
tovim tāvim Abrahamam, Izakam un Jākubam, ka tū atdūs jim.»
Tys ir Dīva vōrds.
PSALME 1
Refrens: Svēteigs
ir veirs, kas cerej uz Kungu. (R. sal. Ps 40,
5a)
1 Svēteigs
ir veirs, kas nasekoj bezdīvu padūmam,
kas nastaigoj grēcinīku ceļu un nasēž
zaimōtōju pulkā,
2 bet
kam prōtā ir Kunga bausleiba
un kas Kunga lykumu apcer dīnu un nakti.
Refrens
3 Jys
leidzynojās kūkam, kas stōdeits yudiņu molā,
kas atnas augļus eistajā laikā un kam
nanūveist lopas;
vyss, kū jys dora,
jam labi izadūd.
Refrens
4 Tai
naīt bezdīvim, tai naīt;
tī ir kai palovas, kū aiznas vējs.
6 Jo
taisneigū ceļš ir Kungam teikams,
bet bezdīvu ceļš izzuss.
Refrens
PYRMSEVANGELIJA DZĪDŌJUMS Mt 4, 17
Lai ir slaveits Dīva vōrds.
Atsagrīzit nu grākim, soka Kungs,
jo dabasu vaļsteiba ir tyvu.
Lai ir slaveits Dīva vōrds.
EVANGELIJS Lk 9, 22–25
Kas sovu dzeiveibu pazaudēs manis dēļ, tys tū izglōbs.
LASEJUMS NU JEZUS KRISTUS EVANGELIJA, KŪ UZRAKSTEJIS SVĀTAIS
LUKASS
Tymā laikā Jezus saceja sovim mōcekļim:
«Cylvāka Dālam vajadzēs daudz cīst un
byut vacōkū un augstū prīsteru, un Rokstu zynōtōju atmastam un nūnōvātam, bet
trešajā dīnā jys augšancelsīs». Pēc tam jys saceja vysim: «Jo kaids grib maņ
sekōt, tys lai aizalīdz pats sevi un ik dīnas lai jam sovu krystu un sekoj maņ.
Jo kas gribēs sovu dzeiveibu izglōbt, tys tū pazaudēs, bet, kas sovu dzeiveibu
pazaudēs manis dēļ, tys tū izglōbs. Jo kū tys leidz cylvākam, jo jys īmantōs
vysu pasauli, bet pats sevi pazaudēs vai nūdareis sev zaudējumu?»
Tys ir Kunga vōrds.