Menu:














 


svātdĪna, 10. septembris

PYRMAIS LASEJUMS Ez 33, 7–9

Atgōdynōšonas pīnōkums.

LASEJUMS NU PRAVĪŠA EZEHIEĻA GRŌMOTAS

Tū soka Kungs:

«Tevi, cylvāka dāls, es nūzeimēju par sorgu Izraeļa nomam. Tōpēc, dzēržūt aizrōdejumus nu munas mutes, tu pamōceisi jūs munā vōrdā. Jo munus vōrdus: «Bezdīvi, tu mērsi,» tu nabyusi bezdīvim pateicis, lai bezdīvis sorgōtūs nu sova ceļa, tod bezdīvis nūmērs sovas nūzīdzeibas dēļ, bet jō asni es atpraseišu nu tovas rūkas. Bet, jo tu byusi breidynōjis bezdīvi, lai jys atsagrīž nu sovim celim, bet jys nu sova ceļa nabyus nūsagrīzis, tod jys nūmērs sovas nūzīdzeibas dēļ, bet tu sovu dvēseli byusu izglōbis.»

Tys ir Dīva vōrds.

 

PSALME 95 (94)

Refrens: Nanūcītynojit sovas sirdis. (R. sal. 8)

1 Nōcit, dzīdōsim Kungam ar prīcu,

līksmi gūdynōsim Dīvu, myusu Pesteitōju.

2 Īsim ar pateiceibu jō vaiga prīškā

un gavilēsim jam dzīsmēs.

Refrens

6 Nōcit, pīlyugsim un krissim pi zemes,

lūceisim ceļus Kunga, myusu Radeitōja, prīškā,

7 jo jys ir myusu Dīvs,

bet mes - jō tauta un jō gonampulka vuškas.

Refrens

8 Kaut jyus šudiņ dzērdētu jō bolsu:

«Nanūcītynojit sovas sirdis

9 kai Meribā un Massas dīnā tuksnesī,

kur mani kārdynōja jyusu tāvi:

jī pōrbaudeja mani,

lai gon beja redzējuši munus dorbus.

Refrens

 

ŪTRAIS LASEJUMS Rom 13, 8–10

Mīlesteiba ir Lykuma izpiļdeišona.

LASEJUMS NU SVĀTŌ APOSTOLA PŌVULA VĒSTULES ROMĪŠIM

Brōli:

Napalicit nivīnam nikō porōdā, kai tikai sovstarpejū mīlesteibu, jo, kas tyvōkū mīļoj, tys izpylda Lykumu. Tōdēļ ka bausleibas:

«Tev nabyus lauleibu pōrkōpt»,

«Tev nabyus nūkaut»,

«Tev nabyus zagt»,

«Tev nabyus īkōrōt»

un, jo vēļ ir kaida cyta bausleiba,

tōs ir ītvartas šymā pavēlē:

«Mīļoj sovu tyvōkū kai sevi pošu.» Mīlesteiba tyvōkajam nadora ļaunu. Tōpēc mīlesteiba ir Lykuma vyspiļneigōkō izpiļdeišona.

Tys ir Dīva vōrds.

 

PYRMSEVANGELIJA DZĪDŌJUMS 2 Kor 5, 19

Alleluja.

Dīvs pasauli caur Kristu samīrynōja ar sevi

un mums deve sasamīrynōšonas vōrdu.

Alleluja.

 

EVANGELIJS Mt 18, 15–20

Brōleigs aizrōdejums.

LASEJUMS NU JEZUS KRISTUS EVANGELIJA, KŪ

UZRAKSTEJIS SVĀTAIS MATEJS

Tymā laikā Jezus saceja sovim mōceklim:

«Jo tovs brōļs sagrākōtu pret tevi, ej un aizrōdi jam, jums tikai divatā asūt. Jo jys tev paklauseis, tu byusi īgyvis sovu brōli, bet, jo naklauseis, pajem sev leidza vēļ vīnu vai divus, lai uz divu vai treju līcinīku vōrdim baļsteitūs vysa patīseiba. Un, jo ari tim jys naklauseitu, tod soki Bazneicai, bet, jo jys nagrybātu paklauseit pat Bazneicai, tod lai jys tev ir kai pogōns un muitnīks. Patīši es jums soku: kū vīn jyus sasīsit vērs zemes, tys byus sasīts ari dabasūs, un kū vīn jyus atraiseisit vērs zemes, tys byus atraiseits ari dabasūs. Un vēļ es jums soku: Jo divi nu jums vērs zemes vīnprōteigi kaut kū lyugs, jī tū sajims nu muna Tāva, kas ir dabasūs. Jo, kur divi vai trejs ir sasapuļcējuši munā vōrdā, tur es asu jūs vydā.»

Tys ir Kunga vōrds.



























Copyright © 2013-2017 Romas katoļu Baznīcas Rēzeknes-Aglonas diecēze